തിരുവനന്തപുരം: പൊതുവിദ്യാഭ്യാസ വകുപ്പിൽ 360 പേർക്ക് കൂടി പി.എസ്.സി വഴി നിയമനം നൽകിയതായി മന്ത്രി വി. ശിവൻകുട്ടി അറിയിച്ചു. ഉദ്യോഗാർത്ഥികൾക്ക് അഡ്വൈസ് മെമ്മോ അയച്ചുകഴിഞ്ഞു. ഇക്കുറി എൽ.പി.എസ്.എ /യു.പി.എസ്.എ തസ്തികയിൽ 1506 നിയമനവും എൽ.പി.എസ്.എ ഭാഷാ വിഭാഗത്തിൽ 139 നിയമനവും യു.പി.എസ്.എ ഭാഷാ വിഭാഗത്തിൽ 352 നിയമനവും സ്‌പെഷ്യൽ ടീച്ചേഴ്സ് വിഭാഗത്തിൽ 112 നിയമനവും എച്ച്.എസ്.എ വിഭാഗത്തിൽ 1019 നിയമനവും ഹയർ സെക്കൻഡറി ജൂനിയർ അദ്ധ്യാപക വിഭാഗത്തിൽ 757 നിയമനവും സീനിയർ വിഭാഗത്തിൽ 11 നിയമനവും നടത്തിയിരുന്നു. 4711 എയ്ഡഡ് സ്‌കൂൾ അദ്ധ്യാപകർക്കും നിയമനാംഗീകാരം നൽകിയെന്നും പൊതുവിദ്യാഭ്യാസ വകുപ്പിൽ ഒഴിവുകൾ റിപ്പോർട്ട് ചെയ്യാതിരിക്കുന്ന സാഹചര്യം ഇല്ല എന്ന് ഉറപ്പു വരുത്തുമെന്നും മന്ത്രി പറഞ്ഞു.