കൽപ്പറ്റ: പൂതാടി പഞ്ചായത്തിലെ അഞ്ചാംവാർഡിൽ ചീയമ്പം പള്ളിപ്പടിയിലെ വിധവയായ വീട്ടമ്മ ചികിത്സാസഹായം തേടുന്നു. മംഗലത്ത് സൈനബ (55) ആണ് ആമവാതം പിടിപെട്ട് കാലിന്റെ എല്ലുകൾ വളഞ്ഞ് നടക്കാനാവാതെ ബുദ്ധിമുട്ടുന്നത്. 13 വർഷം മുമ്പ് ഭർത്താവ് മരിച്ച ശേഷം ഇവർ ഒറ്റയ്ക്കാണ് പഞ്ചായത്ത് നൽകിയ വീട്ടിൽതാമസം. മക്കളോ ബന്ധുക്കളോ ഇല്ല. അസുഖം മൂർച്ഛിച്ച് പരസഹായം കൂടാതെ കഴിയാനാവാത്ത അവസ്ഥയാണ്. അടിയന്തര ശസ്ത്രക്രിയ ചെയ്ത് ഇരുകാലിന്റെയും മുട്ടുമാറ്റിവെച്ചാൽ ഇവരുടെ വൈഷമ്യങ്ങൾക്ക് വലിയൊരളവിൽ പരിഹാരമാകുമെന്നാണ് ഡോക്ടർമാരുടെ വിലയിരുത്തൽ. കോഴിക്കോട്ടെ സ്വകാര്യ ആശുപത്രിയിൽ നിശ്ചയിച്ചിരിക്കുന്ന ശസ്ത്രക്രിയക്ക് അഞ്ചുലക്ഷത്തോളം രൂപ ചെലവു വരും.

ജനപ്രതിനിധികളും നാട്ടുകാരും ചികിത്സാ സഹായനിധി രൂപീകരിച്ച് പണം കണ്ടെത്താനുള്ള ശ്രമത്തിലാണെന്ന് എം.വി.രാജൻ, വി.എ. നാസർ, ബ്ലോക്ക് പഞ്ചായത്തംഗം കലേഷ് സത്യാലയം, ഗ്രാമ പഞ്ചായത്തംഗം ഷിജി ഷിബു, കെ.യു. മാനു എന്നിവർ വാർത്താസമ്മേളനത്തിൽ പറഞ്ഞു. ഗ്രാമ പഞ്ചായത്ത് മെമ്പർ എം.വി.രാജൻ ചെയർമാനും വി.എ.നാസർ കൺവീനറുമായാണ് കമ്മിറ്റി. കേരള ഗ്രാമീൺ ബാങ്ക് ഇരുളം ശാഖയിൽ അക്കൗണ്ട് തുടങ്ങിയിട്ടുണ്ട്. അക്കൗണ്ട് നമ്പർ: 40246100200939.IFSC കോഡ് KLGB 0040246. 9961230229 നമ്പറിൽ ഗൂഗിൾ പേ വഴിയും സഹായം നൽകാം. ഫോൺ: 8848067733, 8111918148.