ചേർത്തല: കു​റ്റകൃത്യങ്ങൾക്ക് തടയിടുന്നതിനും ഗതാഗത നിയമങ്ങൾ ലംഘിക്കുന്നവരെ കണ്ടെത്താനും മുഹമ്മ പൊലീസ് സ്റ്റേഷൻ പരിധിയിലെ പ്രദേശങ്ങൾ കാമറ നിരീക്ഷണത്തിലാക്കും. കാമറകളുടെ സ്വിച്ച് ഓൺ നാളെ വൈകിട്ട് 6ന് മുഹമ്മ പൊലീസ് സ്‌​റ്റേഷൻ അങ്കണത്തിൽ ജില്ലാ പൊലീസ് മേധാവി ജി.ജയദേവ് നിർവഹിക്കും. ആലപ്പി വിഷൻ കേബിൾ നെ​റ്റ് വർക്കിന്റേയും മുഹമ്മ-തണ്ണീർമുക്കം മേഖലയിൽ പ്രവർത്തിക്കുന്ന കേബിൾ ഓപ്പറേ​റ്റർമാരുടേയും വ്യാപാരി - വ്യവസായ സംഘടനകൾ, ധനകാര്യ സ്ഥാപനങ്ങൾ, പ്രധാനപ്പെട്ട കമ്പനി ഉടമകൾ തുടങ്ങിയവരുടെ സഹകരണത്തോടെയാണ് പദ്ധതി നടപ്പാക്കുന്നത്. പ്രധാനപ്പെട്ട ജംഗ്ഷനുകൾ,ബസ് സ്​റ്റാൻഡ്,ബോട്ട് ജെട്ടി, ആരാധനാലയങ്ങൾ ഉൾപ്പടെ 26 ഇടങ്ങളിൽ നൈ​റ്റ് വിഷൻ കളർ കാമറകളും ജില്ലാഅതിർത്തിയായ തണ്ണീർമുക്കം ജംഗ്ഷനിൽ എ.എൻ.പി.ആർ കളർ കാമറയുമാണ് സ്ഥാപിച്ചത്.

ലക്ഷ്യമിടുന്നത്

 വാഹനാപകടമുണ്ടാക്കുന്നവരെ കണ്ടെത്തുക

 പൊതുസ്ഥലത്ത് മാലിന്യം നിക്ഷേപിക്കുന്നത് തടയുക

 സാമൂഹ്യ വിരുദ്ധരെ ട്രാക്ക് ചെയ്യുക

'' പൊതു ജനസുരക്ഷ ഉറപ്പാക്കുക ലക്ഷ്യമിട്ടാണ് മുഹമ്മ പൊലീസ് സ്റ്റേഷൻ പരിധിയിൽ നിരീക്ഷണ കാമറകൾ സ്ഥാപിച്ചത് ഇതിനുവേണ്ടി പ്രത്യേക മോണിട്ടറുകളിൽ 24 മണിക്കൂറും നിരീക്ഷണം ഏർപ്പെടുത്തുന്ന ജോലികൾ പൂർത്തിയായി.

(മുഹമ്മ പൊലീസ് അധികൃർ)