ആലപ്പുഴ : നെഹ്റുട്രോഫി സ്റ്റാർട്ടിംഗ് പോയിന്റിന് സമീപം വീട്ടിലെ ഹോം സ്റ്റേയിൽ അതിഥികളായെത്തുന്ന നാൽപ്പതോളം പേർക്ക് നിത്യേന പാചകം ചെയ്തുള്ള പരിചയം കൈമുതലാക്കി ജിജി സിബിച്ചൻ (41) സ്വന്തമാക്കിയത് ഇന്ത്യൻ ബുക്ക് ഒഫ് റെക്കാഡ്. തത്തംപള്ളി മേരാ മൻ ഹോം സ്റ്റേയിൽ വെള്ളിയാഴ്ച ഇന്ത്യ ബുക്ക് ഒഫ് റെക്കാ‌ഡ് അധികൃതർക്ക് മുമ്പാകെ അര മണിക്കൂർ കൊണ്ട് ജിജി തയാറാക്കിയത് 150 വിഭവങ്ങളാണ്. നാടൻ പുട്ടും, ഇഡലിയും തുടങ്ങി ജ്യൂസ്, ഷേക്ക്, ഉണ്ണിയപ്പം, കൊഴുക്കട്ട, പച്ചക്കറി വിഭവങ്ങൾ, പഴ വിഭവങ്ങൾ, ഇറച്ചിയും മീനും ഉപയോഗിച്ചുള്ള വിവിധ തരം വിഭവങ്ങൾ വരെ ഞൊടിയിടയിൽ തയ്യാറായി. കഴിഞ്ഞ ഏഴ് മാസത്തെ നിരന്തര പരിശീലനത്തിനൊടുവിലായിരുന്നു മത്സരം. ചേർത്തല ഷാരോൺ പബ്ലിക്കേഷൻസിന് വേണ്ടി 13 പാചക പുസ്തകങ്ങൾ രചിച്ചിട്ടുള്ള ജിജി എഫ്.എം പാചക ഷോകളിലും, വിവിധ പാചക മത്സരങ്ങളിലും സ്ഥിരം സാന്നിദ്ധ്യമാണ്. മത്സര വേദിയിൽ തന്നെ ഇന്ത്യൻ ബുക്ക് ഒഫ് റെക്കാഡ് അധികൃതർ പുരസ്ക്കാരം കൈമാറി. തിരക്കിനിടയിലും തനിക്കൊപ്പം പ്രോത്സാഹനം നൽകുന്നത് ഭർത്താവ് സിബിച്ചനും മക്കളായ ജയ്സൺ, സാൻവേവ്, അഭിയ എന്നിവരും സഹോദരങ്ങളടക്കമുള്ള കുടുംബവുമാണെന്ന് ജിജി പറഞ്ഞു.