ആലപ്പുഴ: ഇരു വൃക്കകളും തകരാറിലായ രണ്ടു ചെറുപ്പക്കാരുടെ ശസ്ത്രക്രിയയ്ക്കായി​ നാടൊരുമിച്ചു. ചേർത്തല സെന്റ് മൈക്കിൾസ് കോളേജിൽ എം.എസ്.സി കെമിസ്ട്രി അവസാന വർഷ വിദ്യാർത്ഥിനിയായ കാഞ്ഞിരം ചിറ പുന്നയ്ക്കൽ വീട്ടിൽ റീന തോമസും ഹോട്ടൽ മാനേജ്‌മെന്റ് ബിരുദത്തിന് ശേഷം തൃശൂരിൽ ജോലി ചെയ്തി​രുന്ന കാഞ്ഞിരം ചിറ തൈപ്പറമ്പിൽ വീട്ടിൽ റിച്ചി റിച്ചാഡ്സണും ഗുരുതരമായ വൃക്കരോഗം ബാധിച്ച് ഡയാലിസിസ് വഴി ജീവൻ നിലനിർത്തിപ്പോരുകയാണ്. ഇരുവർക്കും വൃക്ക മാറ്റിവയ്ക്കൽ ശസ്ത്രക്രിയ മാത്രമാണ് പോംവഴിയെന്ന് ഡോക്ടർമാർ നി​ർദ്ദേശി​ക്കുകയായി​രുന്നു. നിർദ്ധന കുടുംബങ്ങളിൽപ്പെട്ട ഇവരുടെ ശസ്ത്രക്രിയാ ചിലവിന് പണം കണ്ടെത്താൻ പി.പി.ചിത്തരഞ്ജൻ എം.എൽ.എ,നഗരസഭ അദ്ധ്യക്ഷ സൗമ്യ രാജ് ,കൗൺസിലർമാരായ എലിസബത്ത് പി.ജി, റഹിയാനത്ത് , ജെസ്സി മോൾ പൊതുപ്രവർത്തകരായ ബേബി ലൂയിസ്, രാഹുൽ, സുബിൻ എന്നിവരുടെ നേതൃത്വത്തിൽ ധനസമാഹരണം നടത്തി. നഗരസഭ അദ്ധ്യക്ഷ സൗമ്യ രാജിന്റെയും കൗൺസിലർ എലിസബത്തിന്റെയും നേതൃത്വത്തിൽ വൈകുന്നേരം ബീച്ചിലും ധന സമാഹരണം നടത്തി.