ആലപ്പുഴ: ഡ്രൈവിംഗ് പരിശീലനത്തിനിടെ വനിത ഓടിച്ച കാർ നിയന്ത്രണം വിട്ട് കനാലിൽ വീണു. കാറിലുണ്ടായിരുന്നവർ അത്ഭുതകരമായി രക്ഷപെട്ടു. വാഹനമോടിച്ചത് മങ്കൊമ്പ് സ്വദേശിനിയായ സിനി സേവ്യറാണ്. ഇവരെ ഡ്രൈവിംഗ് പഠിപ്പിക്കാൻ പരിശീലകനും ഭർത്താവും ഒപ്പമുണ്ടായിരുന്നു. ഇന്നലെ ഉച്ചക്ക് 12.35ന് വാടപൊഴിയിലാണ് സംഭവം. അവധിദിനത്തിൽ കാർ ഡ്രൈവിംഗ് പരിശീലിക്കുന്നതിനിടെയാണ് അപകടമുണ്ടായത്. കനാലിലേക്ക് പതിച്ച കാറിന്റെ മുൻഭാഗം വെള്ളത്തിൽ മുങ്ങിയിരുന്നു. അപകടത്തിൽപ്പെട്ടവരെ നാട്ടുകാരാണ് രക്ഷിച്ചത്. ആർക്കും കാര്യമായ പരിക്കില്ല. സംഭവമറിഞ്ഞ് അഗ്നിരക്ഷാസേനയും പൊലീസും സ്ഥലത്തെത്തിയിരുന്നു. അഗ്നിരക്ഷസേന അസി.സ്റ്റേഷൻ ഓഫിസർ ആർ. ഗിരീഷിന്റെ നേതൃത്വത്തിലുള്ള സംഘം സ്ഥലത്തെത്തി കാറിൽ ആളില്ലെന്ന് ഉറപ്പുവരുത്തിയശേഷം മടങ്ങി. പിന്നീട് ക്രെയിൻ ഉപയോഗിച്ച് കാർ കരക്ക് കയറ്റിയത്.