ചേർത്തല: അദ്ധ്യാപകർ അഞ്ചു ലക്ഷം രൂപ വായ്പയെടുത്ത് വിദ്യാർത്ഥികൾക്ക് ശൗചാലയം നിർമ്മിച്ചു നൽകി.മുഹമ്മ സി.എം.എസ് എൽ.പി സ്‌കൂൾ അദ്ധ്യാപകരാണ് വേറിട്ട പ്രവർത്തനം നടത്തി മാതൃകയായത്.

നിർമ്മാണത്തിന് കരാർ നൽകാതെ ആദ്യാവസാനം മേൽനോട്ടം പ്രധാനാദ്ധ്യാപിക ജോളി തോമസിന്റെ നേതൃത്വത്തിൽ അദ്ധ്യാപകർ തന്നെ ഏ​റ്റെടുക്കുകയും ചെയ്തു. എയ്ഡഡ് സ്‌കൂളുകൾക്ക് ഇത്തരം ആവശ്യങ്ങൾക്ക് ഫണ്ട് ലഭിക്കാത്ത സാഹചര്യത്തിലാണ് വായ്പയെടുക്കേണ്ടി വന്നത്.

ചേർത്തല താലൂക്ക് എയ്ഡഡ് പ്രൈമറി ടീച്ചേഴ്‌സ് കോ-ഓപ്പറേ​റ്റീവ് സൊസൈ​റ്റിയിൽ നിന്നുമാണ് വായ്പയെടുത്തത്. എട്ട് അദ്ധ്യാപകർ ചേർന്ന് മാസംതോറും 11,000രൂപ വീതം തിരിച്ചടവ് തുടങ്ങി.5വർഷമാണ് കാലാവധി. 640 കുട്ടികൾ പഠിക്കുന്ന ഇവിടെ പഴയ ശൗചാലയം പൊളിച്ചുമാ​റ്റിയാണ് പുതിയത് നിർമ്മിച്ചത്. പ്രധാനാദ്ധ്യാപിക ജോളി തോമസ് ഉദ്ഘാടനം ചെയ്തു. സീനിയർ അസിസ്​റ്റന്റ് സിസി മാത്യു,സ്​റ്റാഫ് സെക്രട്ടറി എം.വൈ.അന്നമ്മ,പി.ടി.എ പ്രസിഡന്റ് കെ.എസ്.ലാലിച്ചൻ എന്നിവർ സംസാരിച്ചു.

അദ്ധ്യാപകർ വായ്പയെടുത്ത് വർഷങ്ങൾക്ക് മുമ്പ് സ്‌കൂളിൽ സ്​റ്റേജ് നിർമ്മിച്ചിരുന്നു. കുട്ടികൾ ഇല്ലാതെ അടച്ചു പൂട്ടലിനെ അഭിമുഖീകരിച്ച സ്‌കൂളാണിത്.ചുരുങ്ങിയ നാളുകൾക്കുള്ളിൽ വിവിധ പ്രവർത്തനങ്ങൾക്കുള്ള അംഗീകാരമായി 50ഓളം പുരസ്‌കാരങ്ങൾ സ്‌കൂളിന് ലഭിച്ചു. പ്രധാനാദ്ധ്യാപിക ജോളി തോമസിന് സംസ്ഥാന അദ്ധ്യാപക അവാർഡ്, അനീ​റ്റ,ജെസി തോമസ് എന്നീ അദ്ധ്യാപികമാർക്ക് റോട്ടറിക്ലബ് അവാർഡ്, അദ്ധ്യാപകനായ മുഹമ്മദ് റാഫിക്ക് തുടർച്ചയായി മൂന്ന് വർഷം മികച്ച കബ് മാസ്​റ്റർ അവാർഡ് എന്നിവ നേടാനായി.