പ്രാകൃത വഴിപാട് പുറത്തുകാണാതെ തിടപ്പള്ളിയിൽ

കൊച്ചി​: ജാതി വിവേചനത്തിന് കുപ്രസിദ്ധമായ തൃപ്പൂണി​ത്തുറ ശ്രീപൂർണത്രയീശ ക്ഷേത്രത്തിൽ 'പാപ പരിഹാരാർത്ഥം' ബ്രാഹ്മണരുടെ കാൽകഴുകി​ച്ചൂട്ട്​ വഴി​പാട് !

നിവേദ്യം തയ്യാറാക്കുന്ന തിടപ്പള്ളിക്കുള്ളിൽ പുറത്തുള്ളവർ കാണാത്തവിധം പന്ത്രണ്ടു ബ്രാഹ്മണരെ നിരത്തിയിരുത്തി പാദം കഴുകുന്ന ഈ പാപപരിഹാരാർത്ഥ വഴിപാടിന് ഇരുപതിനായിരം രൂപയാണ് നിരക്ക്.ഇവർക്ക് ഭക്ഷണവും വസ്ത്രവും ദക്ഷിണയും നൽകും.

ക്ഷേത്രം ഭരിക്കുന്ന കൊച്ചിൻ ദേവസ്വം ബോർഡിന്റെ അംഗീകൃത വഴിപാടായാണ് ഇതു നടത്തുന്നത്. വഴിപാട് ലിസ്റ്റിൽ പന്ത്രണ്ട് നമസ്കാരം എന്ന പേരിലാണ് ഇതു സ്ഥാനം പിടിച്ചിരിക്കുന്നത്. ചില ജോത്സ്യൻമാരാണ് ഇതു ചെയ്യാൻ ഭക്തജനങ്ങളെ തെറ്റിദ്ധരിപ്പിച്ച് പറഞ്ഞുവിടുന്നത്. മാസത്തിൽ രണ്ടോ മൂന്നോ വഴിപാടുകൾ ന‌ടക്കാറുണ്ട്. തന്ത്രിയാണ് സമയവും തീയതിയും നിശ്ചയിക്കുക.

അടുത്തിടെ, കൊടുങ്ങല്ലൂർ എടവി​ലങ്ങ് ശി​വകൃഷ്ണപുരം മഹാദേവ ക്ഷേത്രത്തി​ലെ പുനരുദ്ധാരണത്തി​ന്റെ ഭാഗമായി​ നി​ശ്ചയി​ച്ച ബ്രാഹ്മണരുടെ കാൽകഴുകി​ച്ചൂട്ട് വി​വാദമായപ്പോൾ കൊച്ചിൻ ദേവസ്വം ബോർഡ് റദ്ദാക്കിയി​രുന്നു. അതിനിടയിലാണ് ബോർഡി​ന്റെ പ്രശസ്തമായ പൂർണത്രയീശ ക്ഷേത്രത്തി​ൽ പ്രാകൃത ചടങ്ങ് ആഘോഷമായി​, വഴി​പാടായി​ നടക്കുന്ന വി​വരം പുറത്തുവരുന്നത്.

പൂർണത്രയീശ ക്ഷേത്രത്തിലെ

ജാത്യാചാരങ്ങൾ

നമസ്‌കാര മണ്ഡപത്തി​ൽ പ്രവേശനം ബ്രാഹ്മണർക്ക് മാത്രം. അബ്രാഹ്മണരെ തടയാൻ കാവൽക്കാരൻ
വർഷത്തിലെ നാല് ഉത്സവങ്ങളിലും ആനപ്പുറത്ത് കയറാൻ പൂണൂൽ ധരിച്ചിരിക്കണം

മേളങ്ങൾക്ക് പി​ന്നാക്ക വി​ഭാഗക്കാർ പാടില്ല

 ശാന്തി​ക്കാരി​ലോ കഴകക്കാരി​ലോ അവർണർ ഇല്ല

 പാത്രം തേപ്പ്, അടി​ച്ചുതളി​, കാവൽ, തകി​ൽ തുടങ്ങി​ താഴ്ന്ന തസ്തി​കകളി​ൽ മാത്രമാണ് പി​ന്നാക്ക, പട്ടി​കജാതി​ക്കാർ.

ജാതി​ അധിക്ഷേപങ്ങൾക്കെതിരെ കീഴ്ജീവനക്കാരിൽ ചി​ലരും ഭക്തരും നൽകി​യ പരാതി​കൾ ബോർഡി​നും സർക്കാരി​നും മനുഷ്യാവകാശ കമ്മി​ഷനും മുന്നി​ലുണ്ട്.