പറവൂർ: ലോക കാൻസർ ദിനത്തിൽ മൂത്തകുന്നം എസ്.എൻ.എം ട്രെയിനിംഗ് കോളേജും തൃശൂർ അമല ഇൻസ്റ്റിറ്റ്യൂട്ട് ഒഫ് മെഡിക്കൽ സയൻസസ് ആൻഡ് കാൻസർ റിസർച്ച് സെന്ററുമായി സഹകരിച്ച് കേശദാന വേദിയൊരുക്കി. തുടർച്ചയായി നാലാം വർഷവും സംഘടിപ്പിക്കുന്ന 'കേശദാനം-സ്നേഹദാനം' കൂത്താട്ടുകുളം മേരിഗിരി സി.എം.ഐ പബ്ലിക് സ്കൂൾ വിദ്യാർത്ഥിനി ടി.സി. പൂജാലക്ഷ്മിയുടെ മുടി മുറിച്ച് പ്രിൻസിപ്പൽ ഇൻ ചാർജ് ഡോ. പി.എസ്. സുസ്മിത ഉദ്ഘാടനം ചെയ്തു.

കീമോതെറാപ്പിയുടെ ഫലമായി ഉണ്ടാകുന്ന മുടികൊഴിച്ചിൽ മൂലം രോഗികൾക്ക് നഷ്ടപ്പെട ആത്മവിശ്വാസം വീണ്ടെടുക്കുക എന്നതാണ് ലക്ഷ്യം. കാമ്പയിനിന്റെ ഭാഗമായി ലഭിക്കുന്ന മുടി ഉപയോഗിച്ച് കാൻസർ രോഗികൾക്ക് സൗജന്യമായി വിഗ്ഗ് നിർമിച്ചു നൽകും. പ്രോഗ്രാം കോ ഓഡിനേറ്റർ പി.കെ. സെബാസ്റ്റ്യൻ, വി.കെ. സരിത, സി.എൻ. ഐശ്വര്യ, ഡോ. കെ.എസ്. കൃഷ്ണകുമാർ എന്നിവർ സംസാരിച്ചു. ഇന്ദു അമൃതരാജ് മാസങ്ങളായി ശേഖരിച്ച മുപ്പത് പേരുടെ മുടി കൈമാറി. മുടിദാനം ചെയ്തവർക്ക് സർട്ടിഫിക്കറ്റുകളും ഉപഹാരങ്ങളും നൽകി. മേക്കപ്പ് ആർട്ടിസ്റ്റ് ലൈജു പ്രകാശ് മുടി മുറിക്കുന്നതിന് നേതൃത്വം നൽകി.