കാലടി: മേക്കാലടിയിൽ അന്യസംസ്ഥാന തൊഴിലാളി മരിച്ചത് വാഹനമിടിച്ചാണെന്ന് പൊലീസിന്റെ കണ്ടെത്തൽ. വാഹനമോടിച്ച മേക്കാലടി പീഡിയേക്കൽ കുഞ്ഞുമുഹമ്മദിനെ (64) കാലടി പൊലീസ് അറസ്റ്റ് ചെയ്തു. മറ്റൂർ ഗവൺമെന്റ് ആശുപത്രിക്ക് സമീപം വാടകയ്ക്ക് താമസിക്കുന്ന റാം സിംഗ് ആണ് മരിത്. കഴിഞ്ഞ 2ന് രാത്രി 9നായിരുന്നു അപകടം.

ജില്ലാ പൊലീസ് മേധാവി കെ.കാർത്തിക്കിന്റെ നേതൃത്വത്തിൽ പ്രത്യേക ടീം ശാസ്ത്രീയ അന്വേഷണത്തിലാണ് വാഹനം ഇടിച്ചാണ് മരണമെന്ന് സ്ഥിരീകരിച്ചത്. വാഹനമോടിച്ച കുഞ്ഞുമുഹമ്മദ് ചിലരുടെ സഹായത്തോടെ റാം സിംഗിനെ മാറ്റിക്കിടത്തി മുങ്ങുകയായിരുന്നു.

ഫിംഗർ പ്രിന്റ്, സൈൻറിഫിക് ടീം, ഡോഗ് സ്ക്വാഡ്, ഫോറൻസിക് ടീം തുടങ്ങിയവർ അന്വേഷണത്തിൽ പങ്കാളിയായി. എ.എസ്.പി അനുജ് പലിവാൽ, എസ്.എച്ച്.ഒ. ബി. സന്തോഷ്, എസ്.ഐ. കെ.വി.ജയിംസ്, എ.എസ്.ഐമാരായ അബ്ദുൾ സത്താർ, ജോഷി എം.തോമസ്, എസ്.സി.പി.ഒമാരായ അനിൽകുമാർ, എ.വി.പ്രിൻസ്, മനോജ് കുമാർ, ജയന്തി തുടങ്ങിയവർ അന്വേഷണ സംഘത്തിലുണ്ടായിരുന്നു.