വൈപ്പിൻ: എം.എൽ.എ യുടെ നേതൃത്വത്തിൽ ആവിഷ്‌കരിച്ച സമഗ്രറോഡ് സുരക്ഷാപദ്ധതിക്ക് തുടക്കമായി. ആദ്യഘട്ടമായ 'ഇനിയും വൈപ്പിൻ കരയാതിരിക്കാൻ' ബോധവത്കരണ കാമ്പയിൻ കാളമുക്ക് ജംഗ്ഷനിൽ കെ. എൻ. ഉണ്ണിക്കൃഷ്ണൻ എം.എൽ.എ ഉദ്ഘാടനം ചെയ്തു. കാമ്പയിന് വാഹനമോടിക്കുന്നവർ ഉൾപ്പെടെ എല്ലാ തലങ്ങളിലുമുള്ളവരിൽനിന്ന് ലഭിച്ച സ്വീകാര്യത ആപത്കരമായ അമിതവേഗത്തിനും മത്സരിച്ചോട്ടത്തിനും ട്രാഫിക് നിയമലംഘനങ്ങൾക്കുമെതിരായ ജനവികാരം എത്രകണ്ട് ശക്തമാണെന്ന് പ്രതിഫലിപ്പിക്കുന്നതാണെന്ന് എം.എൽ.എ പറഞ്ഞു. മികച്ചറോഡ് ഗതാഗത സംസ്‌കാരത്തിനാണ് സുരക്ഷാപദ്ധതിയിലൂടെ ലക്ഷ്യമിടുന്നത്. ബോധവത്കരണ കാമ്പയിനും അവബോധ ക്‌ളാസുകൾക്കുംശേഷവും ട്രാഫിക് നിയമം ലംഘിക്കുന്നവർക്കെതിരെ പൊലീസ്,മോട്ടോർ വാഹനവകുപ്പ് അധികൃതർ കർശനനടപടി സ്വീകരിക്കും. ബ്ലോക്ക് പഞ്ചായത്ത് അംഗം ക്ലാര സൈമൺ അദ്ധ്യക്ഷത വഹിച്ചു.

ഞാറക്കൽ സി. ഐ. രാജൻ കെ. അരമനയും എം.വി.ഐ എൻ. വിനോദ്കുമാറും റോഡ് സുരക്ഷാസന്ദേശം നൽകി. ഇടപ്പള്ളി ബ്ലോക്ക് പഞ്ചായത്ത് പ്രസിഡന്റ് ട്രീസ മാനുവൽ, എളങ്കുന്നപ്പുഴ ഗ്രാമ പഞ്ചായത്ത് പ്രസിഡന്റ് രസികല പ്രിയരാജ്, ഫ്രാഗ് പ്രസിഡന്റ് അഡ്വ. വി. പി. സാബു, പ്രസ് ക്ലബ് പ്രസിഡന്റ് അനിൽ പ്ലാവിൻസ്, സുധീർ, കുര്യൻ ജോൺസൺ, വാർഡ് അംഗം ലിഗേഷ് സേവ്യർ എന്നിവർ പ്രസംഗിച്ചു. വോളണ്ടിയർമാർ വാഹനയാത്രക്കാർക്ക് ബോധവത്കരണ ലഘുലേഖകൾ വിതരണംചെയ്തു.
ഞാറക്കൽ ആശുപത്രി ജംഗ്ഷനിൽ ഗ്രാമപഞ്ചായത്ത് പ്രസിഡന്റ് ടി. ടി. ഫ്രാൻസിസ് അദ്ധ്യക്ഷത വഹിച്ചു. വൈസ് പ്രസിഡന്റ് മിനി രാജു, ഞാറക്കൽ എസ്.ഐ എ.കെ. സുധീർ, അഡ്വ. വി.പി. സാബു, എന്നിവർ കാമ്പയിന് നേതൃത്വം നൽകി.
ചെറായിയിൽ പള്ളിപ്പുറം പഞ്ചായത്ത് പ്രസിഡന്റ് രമണി അജയൻ അദ്ധ്യക്ഷത വഹിച്ചു. ജില്ലാ പഞ്ചായത്ത് അംഗം അഡ്വ. എം.ബി. ഷൈനി മുഖ്യപ്രഭാഷണം നടത്തി.