തൃപ്പൂണിത്തുറ: അത്യാധുനിക ഫിനാൻഷ്യൽ സൂപ്പർമാർക്കറ്റാകാനുള്ള ചുവടുവയ്പ്പുമായി തൃപ്പൂണിത്തുറ പീപ്പിൾസ് അർബൻ കോ-ഓപ്പറേറ്റീവ് ബാങ്ക്. ഇതിനായി ഒട്ടേറെ പദ്ധതികളാണ് മുന്നോട്ടുവയ്ക്കുന്നതെന്ന് ബാങ്ക് ചെയർമാൻ സി.എൻ. സുന്ദരൻ പത്രസമ്മേളനത്തിൽ പറഞ്ഞു.

ആർ.ടി.ജി.എസ്.,​ എൻ.ഇ.എഫ്.ടി സേവനങ്ങൾ ബാങ്കിൽ നടപ്പാക്കി. ചെക്ക് ക്ളിയറിംഗ് മറ്റു ബാങ്കുകൾക്ക് സമാനമായി ചെന്നൈ സി.ടി.എസ് ക്ളിയറിംഗ് വഴിയാക്കി. എ.ടി.എം.,​ റൂപേ കാർഡ്,​ ഐ.എം.പി.എസ്.,​ ബി.ബി.പി.എസ്.,​ ഫാസ്ടാഗ് എന്നിവയും ബാങ്കിൽ ലഭ്യമാണ്. വിദേശത്തേക്ക് പഠനത്തിനും ജീവിതച്ചെലവിനും ചികിത്സയ്ക്കും വിദേശകറൻസി അയയ്ക്കാൻ തോമസ് കുക്ക് ഇന്ത്യയുമായും ഐ.ഡി.ബി.ഐ ബാങ്കുമായും ധാരണയിലെത്തി.

ഭവന വായ്‌പകൾ എച്ച്.എൽ.,​ എച്ച്.എൽ ഇ.എം.ഐ.,​ എച്ച്.എൽ ഇ.എം.ഐ ഫ്ളോട്ടിംഗ് രീതികളിൽ ലഭിക്കും. 7.8 ശതമാനം മുതലാണ് പലിശ. പരമാവധി തിരിച്ചടവ് കാലാവധി 20 വർഷം. സ്വർണപ്പണയത്തിന് 100 രൂപയ്ക്ക് 50 പൈസയാണ് (5.99 ശതമാനം)​ പലിശ. ഡീസൽ ബസുകൾ സി.എൻ.ജിയിലേക്ക് മാറ്റാനും ബാങ്ക് വായ്‌പ നൽകുന്നുണ്ടെന്ന് അദ്ദേഹം പറഞ്ഞു. വിദേശ പഠനത്തിനായി കുട്ടികൾക്ക് 96 മാസക്കാലാവധിയിൽ 20 ലക്ഷം രൂപവരെ വായ്‌പയും ലഭ്യമാണ്. ജനറൽ മാനേജർ കെ. ജയപ്രസാദ്, മെമ്പർമാരായ ഭദ്രൻ, പത്മിനി ശിവശങ്കരൻ എന്നിവരും പത്രസമ്മേളനത്തിൽ സംബന്ധിച്ചു.

 ആകർഷക നിരക്കിൽ

സൗരോർജ വായ്പ

105 വർഷത്തെ പ്രവർത്തനപാരമ്പര്യമുള്ള പീപ്പിൾസ് ബാങ്ക് കഴിഞ്ഞ നാലുവർഷമായി സമ്പൂർണ്ണ സൗരോർജത്തിലാണ് പ്രവർ‌ത്തിക്കുന്നത്. ഉപഭോക്താക്കൾക്ക് ആകർഷകനിരക്കിൽ സൗരോർജ വായ്പ ലഭ്യമാക്കുന്നുമുണ്ട്. കെ.എസ്.ഇ.ബി.,​ അനർട്ട് എന്നിവയുമായി സഹകരിച്ച് സംസ്ഥാന സർക്കാർ നടപ്പാക്കുന്ന 'സോളാൽ ലോൺ" ആണിത്. 2കെ.ഡബ്ല്യു മുതൽ 5കെ.ഡബ്ല്യു വരെ ശേഷിയുള്ള പ്ളാന്റുകൾ സ്ഥാപിക്കാൻ വായ്‌പ ലഭിക്കും. ഈ ലോണിനായി ബാങ്കിൽ രജിസ്റ്റർ ചെയ്‌താൽ പ്ളാന്റ് ഇൻസ്റ്റാലേഷൻ കെ.എസ്.ഇ.ബി ചെയ്‌തുതരും.

 10,​000 രൂപ മുതൽ 20,​000 രൂപവരെ ഡൗൺപേമെന്റ് നൽകണം.

 87,​000 രൂപമുതൽ 1.70 ലക്ഷം രൂപവരെ ബാങ്ക് വായ്‌പ നൽകും.

 ലാഭേച്‌ഛയില്ലാതെ മാതൃകാപരമായാണ് ബാങ്ക് ഈ പദ്ധതി നടപ്പാക്കുന്നത്.

 രണ്ടുവർഷത്തെ സ്കീമിന് 6.59 ശതമാനം,​ മൂന്നുവർഷത്തെ സ്കീമിന് 6.99 ശതമാനം എന്നിങ്ങനെയാണ് പലിശ.