മൂവാറ്റുപുഴ: നിർമ്മാണം നിലച്ചുപോയ മൂവാറ്റുപുഴ കെ.എസ്.ആർ.ടി.സി സ്റ്റാൻഡ് നിർമ്മാണം ഉടൻ തുടങ്ങും. ബസ്‌സ്റ്റാൻഡ് ടെർമിനൽ-ഷോപ്പിംഗ് കോംപ്ലക്‌സുകളുടേയും കെട്ടി​ടത്തി​ന്റേയും നിർമ്മാണം പൂർത്തിയാക്കാൻ 1,84,26,000 രൂപയുടെ ഭരണാനുമതി ലഭിച്ചതായി ഡോ. മാത്യു കുഴൽനാടൻ എം.എൽ.എ അറിയിച്ചു. ടെർമിനൽ കം ഷോപ്പിംഗ് കോംപ്ലക്‌സിന്റെ പൂർത്തീകരണത്തിനായി 7,42,376.27രൂപയും കെട്ടി​ടത്തി​ന് 16,38,683.29 രൂപയും സബ്‌സ്റ്റേഷന് 18,47,253.95 രൂപയും ടാങ്ക് നിർമ്മാണത്തിനായി 2,16,483.32 രൂപയും ഇലക്ട്രിക്കൽ വർക്കിനായി 1,08,81,416 രൂപയും മറ്റു ചെലവുകൾക്കായി 4,59,786.40രൂപയും അടക്കമാണ് ഭരണാനുമതി ലഭിച്ചത്. പ്രൊജക്ട് മാനേജ്‌മെന്റ് കൺസൾട്ടന്റായ ഹിൽലൈഫ്‌കെയറാണ് പ്രൊജക്ട് കൺസൾട്ടന്റ്.

കരാറുകാരന് പണം ലഭിക്കാതായതോടെ നിർമ്മാണം നിറുത്തിവച്ച് കോടതിയെ സമീപിച്ചിരുന്നു. കോടതി കരാറുകാരന് പണംനൽകാൻ വി​ധി​ച്ചെങ്കിലും കെ.എസ്.ആർ.ടി.സി തയ്യാറായില്ല. നിർമ്മാണം തുടരുന്നതിന് ഇതും തടസമായി. ഇതോടെ നിലച്ചുപോയ നിർമ്മാണം പൂർത്തിയാക്കാൻ എം.എൽ.എ മന്ത്രിതലത്തിലും മാനേജിംഗ് ഡയറക്ടറുമായും നടത്തിയ നിരന്തര ചർച്ചകളെത്തുടർന്നാണ് കരാറുകാരന് പണം നൽകാൻ തീരുമാനമായത്. കരാറുകാരന് ആദ്യപടിയായി 2കോടി നൽകി. ബാക്കി നൽകാമെന്ന ഉറപ്പും ലഭിച്ചതോടെയാണ് കരാറുകാർ സൈറ്റൊഴിവാക്കി നൽകിയത്. ഇതോടെയാണ് കെ.എസ്.ആർ.ടി.സിക്ക് പുതിയ ടെൻഡർ നടപടികൾ ആരംഭിക്കാൻ കഴിഞ്ഞത്. സ്റ്റാൻഡി​ന്റെ നിർമ്മാണം പൂർത്തിയാക്കുന്നതിന്റെ ഭാഗമായി യാത്രക്കാരിലും പൊതുജനങ്ങളിൽനിന്നും എം.എൽ.എ നേരിട്ടെത്തി അഭിപ്രായങ്ങൾ സ്വരൂപിച്ചിരുന്നു. ഇതിന്റെ അടിസ്ഥാനത്തിലുള്ള നവീകരണ പ്രവർത്തനങ്ങൾ അടിയന്തരമായി പൂർത്തിയാക്കുമെന്നും എം.എൽ.എ പറഞ്ഞു.