കൊച്ചി: ഹോട്ടലിൽ 15 ദിവസം മുറിയെടുത്ത് ലഹരിമരുന്ന് വിൽക്കുന്നതിനിടെ എക്സൈസ് - കസ്റ്രംസ് സംയുക്ത ഓപ്പറേഷനിൽ അറസ്റ്റിലായ സംഘത്തിലെ രണ്ട് പേർ ഗൾഫിൽ ലഹരി ഇടപാടിന് 25 വർഷം തടവിന് ശിക്ഷിക്കപ്പെട്ടവ‌ർ. ആലുവ മുപ്പത്തടം തച്ചവള്ളത്ത് വീട്ടിൽ റിച്ചു റഹ്മാൻ (30), മലപ്പുറം തിരൂരങ്ങാടി പുതുക്കിടി വീട്ടിൽ മുഹമ്മദ് അലി (32) എന്നിവരെയാണ് വിദേശത്തും ശിക്ഷിച്ചത്. പെരുന്നാളിന്റെ പൊതുമാപ്പിൽ ശിക്ഷയിളവ് ലഭിച്ചാണ് നാട്ടിലെത്തിയതെന്ന് ചോദ്യം ചെയ്യലിനിടെ പ്രതികൾ വെളിപ്പെടുത്തി.

കണ്ണൂർ കണ്ണൂക്കരയിൽ പി.എം വീട്ടിൽ പി.എം. സൽമാൻ (26), തൃശൂർ കേച്ചേരി കുന്നത്തുള്ളി വീട്ടിൽ കെ.ബി. വിബീഷ് (32), കൊല്ലം മൈനാഗപ്പള്ളി കാവിൽ വീട്ടിൽ ഷിബു ലത്തീഫ് (37), കൊല്ലം തൊടിയൂർ ദാറുൽ മില്ലത്ത് വീട്ടിൽ ജുബൈർ (29), ആലപ്പുഴ കാർത്തികപ്പള്ളി ശ്യാം നിവാസിൽ ശരത് (33), കൊല്ലം മുഖത്തല ഷമീന മൻസിലിൽ തൻസില (24) എന്നിവരാണ് പിടിയിലായ മറ്റുള്ളവർ. വിദേശത്തെ കേസിനെക്കുറിച്ചും എക്സൈസ് അന്വേഷിക്കും. റിച്ചു അടിപിടിക്കേസുകളിലും പ്രതിയാണ്. കൊല്ലം സ്വദേശികൾ കൊലപാതകക്കേസിൽ പ്രതികളാണെന്ന് സൂചനയുണ്ട്.

റിച്ചു, മുഹമ്മദ് അലി, സൽമാൻ, വിബീഷ് എന്നവരാണ് ലഹരിക്കച്ചവടം നടത്തിയത്. മറ്റുള്ളവർ വാങ്ങാൻ എത്തിവരാണ്. 56 ഗ്രാം എം.ഡി.എം.എയുമായി ചൊവ്വാഴ്ച പുലർച്ചെയാണ് പ്രതികൾ പിടിയിലായത്. 10 മൊബൈൽ ഫോണുകളും മൂന്ന് കാറുകളും കണ്ടെടുത്തിട്ടുണ്ട്. പ്രതികളുടെ ഫോൺവിളികളും പരിശോധിക്കും.

 അസി. കമ്മിഷണ‌ർ അന്വേഷിക്കും

എം.ഡി.എം.എ കേസ് എക്‌സൈസ് അസിസ്റ്റന്റ് കമ്മിഷണർ അന്വേഷിക്കും. എറണാകുളം എക്‌സൈസ് റേഞ്ച് ഇൻസ്‌പെക്ടറുടെ ടീമാണ് അറസ്റ്റ് രേഖപ്പെടുത്തിയത്.