കോലഞ്ചേരി: സെന്റ് പീ​റ്റേഴ്‌സ് ആൻഡ് സെന്റ് പോൾസ് ഓർത്തഡോക്‌സ് പള്ളിക്കു കീഴിൽ സെൻറ് പീ​റ്റേഴ്‌സ് വൊക്കേഷണൽ ആൻഡ് ഹയർ സെക്കൻഡറി സ്‌കൂളിൽ കടയിരുപ്പ് പ്ലാന്റ് ലിപിഡ്‌സ് കമ്പനി സൗജന്യമായി നിർമ്മിച്ച സ്‌പോർട്‌സ് സെന്ററിൻെറ കൂദാശ ഇന്ന് രാവിലെ 10ന് ബസേലിയോസ് മാർത്തോമ മാത്യൂസ് തൃതീയൻ കാതോലിക്കാ ബാവാ നിർവ്വഹിക്കും. 5 കോടിയോളം രൂപ ചെലവഴിച്ചാണ് വിദ്യാർത്ഥികളുടെ കായിക പുരോഗതിക്കായി അന്തർദ്ദേശീയ നിലവാരത്തിൽ സ്‌കൂൾ ശതാബ്ദി സ്മാരകമായി​ സ്‌പോർട്‌സ് സെന്റർ നിർമ്മിച്ചത്. ഔട്ട്‌ഡോർ വോളിബാൾ കോർട്ട്, അത്‌ല​റ്റിക് ഗ്രൗണ്ട് എന്നീ സൗകര്യങ്ങളാണ് ഒരുക്കിയിരിക്കുന്നത്. പൂർണ്ണമായും ശീതീകരി​ച്ച സ്‌പോർട്‌സ് സെന്ററിൽ 4 ഷട്ടിൽ ബാഡ്മിന്റൺ കോർട്ടുകളും ടേബിൾ ടെന്നീസ് പരിശീലന കേന്ദ്രവുമുണ്ട്. വിദ്യാലയത്തിന് മനോഹരമായ ചു​റ്റുമതിൽ, സുരക്ഷാ ക്രമീകരണങ്ങളോടെയുള്ള 2 പ്രവേശന കവാടങ്ങൾ, ജനറേ​റ്റർ, ടൈൽവിരിച്ച നടപ്പാത, ടോയ്ലെറ്റ് സമുച്ചയം എന്നിവയും ഒരുക്കിയിട്ടുണ്ട്.