കൊച്ചി: ഗാന്ധിനഗർ പി ആൻഡ് ടി കോളനിയിലെ 83 കുടുംബങ്ങൾക്കായി ലൈഫ് മിഷൻ പദ്ധതിയിൽപ്പെടുത്തി മുണ്ടംവേലിയിൽ നിർമ്മിക്കുന്ന വീടുകളുടെ നിർമ്മാണം പുരോഗമിക്കുന്നു. ജി.സി.ഡി.എ. ചെയർമാൻ കെ. ചന്ദ്രൻപിള്ളയും കെ. ജെ. മാക്‌സി എം.എൽ.എയും കഴിഞ്ഞദിവസം സ്ഥലം സന്ദർശിച്ച് നിർമ്മാണം ദ്രുതഗതിയിൽ തീർക്കാൻ ഉദ്യോഗസ്ഥർക്ക് നിർദ്ദേശം നൽകി. മേയ് മാസത്തോടുകൂടി നിർമ്മാണം പൂർത്തീകരിച്ചു ഗുണഭോക്താക്കൾക്ക് കൈമാറാനാണ് ലക്ഷ്യമിടുന്നത്. തൃശൂർ ജില്ലാ ലേബർ കോൺട്രാക്ട് കോ ഓപ്പറേറ്റീവ് സൊസൈറ്റിക്കാണ് നിർമ്മാണചുമതല. ജി.സി.ഡി.എ. സെക്രട്ടറി കെ. വി. അബ്ദുൾ മാലിക്, കൗൺസിലർ കലിസ്റ്റ പ്രകാശൻ എന്നിവർ ഒപ്പമുണ്ടായിരുന്നു.