ന്യൂഡൽഹി: പ്രമുഖ വിദ്യാഭ്യാസ വിചക്ഷണനും സാമൂഹ്യ പരിഷ്കർത്താവും ആത്മീയാചാര്യനുമായ ശ്രീ എമ്മിനെ ഹൈദരാബാദിലെ മൗലാനാ ആസാദ് നാഷണൽ ഉർദു സർവകലാശാലയുടെ ചാൻസലറായി രാഷ്ട്രപതി നിയമിച്ചു. മൂന്നു വർഷത്തേക്കാണ് നിയമനം.

മലയാളിയായ മുംതാസ് അലിയുടെ ആത്മീയനാമമാണ് ശ്രീ എം. സാമൂഹ്യപരിഷ്കരണ,​ വിദ്യാഭ്യാസ രംഗങ്ങളിലെ സംഭാവനകൾ മാനിച്ച് 2020 ൽ രാജ്യം പദ്മഭൂഷൺ നൽകി ആദരിച്ചു. സദ്സംഗ് ഫൗണ്ടേഷൻ സ്ഥാപകനാണ്. 2015- ൽ കന്യാകുമാരി മുതൽ കാശ്മീർ വരെ നടത്തിയ 'വാക് ഒഫ് ഹോപ്' യാത്ര ശ്രദ്ധിക്കപ്പെട്ടു. ദ ജേർണി കണ്ടിന്യൂസ് എന്ന ആത്മകഥാഗ്രന്ഥം ഉൾപ്പെടെ പത്തോളം കൃതികൾ രചിച്ചിട്ടുണ്ട്.