ഇടുക്കി:പട്ടികവർഗ്ഗ വികസന വകുപ്പിനു കീഴിൽ പട്ടികജാതി പട്ടികവർഗ്ഗ വിദ്യാർത്ഥികൾക്കായി പ്രവർത്തിക്കുന്ന കേരളത്തിലെ 14 മോഡൽ റസിഡൻഷ്യൽ/ആശ്രമം സ്‌കൂളുകളിൽ പുതിയ അദ്ധ്യയനവർഷം 5, 6 ക്ലാസ്സുകളിലേക്കുള്ള വിദ്യാർത്ഥികളുടെ പ്രവേശനത്തിനായി അപേക്ഷ ക്ഷണിച്ചു. സ്‌കൂളുകളിൽ ചേരുന്നതിനുള്ള പ്രവേശന പരീക്ഷ മാർച്ച് 12ന് രാവിലെ 10 മുതൽ വിവിധ കേന്ദ്രങ്ങളിൽ നടത്തും. രക്ഷകർത്താക്കളുടെ കുടുംബ വാർഷിക വരുമാനം 1,00,000/ രൂപയോ, അതിൽ കുറവുള്ളതോ ആയ വിദ്യാർത്ഥികൾക്ക് പരീക്ഷ എഴുതാൻ അപേക്ഷിക്കാം. പ്രാക്തന ഗോത്രവർഗ്ഗക്കാർക്ക് പ്രവേശന പരീക്ഷ ബാധകമല്ല. വയനാട് ജില്ലയിലെ പൂക്കോട്, ഇടുക്കി ജില്ലയിലെ പൈനാവ്, പാലക്കാട് ജില്ലയിലെ അട്ടപ്പാടി എന്നിവിടങ്ങളിലെ ഏകലവ്യാ മോഡൽ റസിഡൻഷ്യൽ സ്‌കൂളുകളിൽ 6ാം ക്ലാസ്സിലേക്കും, മറ്റ് മോഡൽ റസിഡൻഷ്യൽ സ്‌കൂളുകളിൽ 5ാം ക്ലാസ്സിലേക്കുമാണ് പ്രവേശനം നൽകുന്നത്. വിശദവിവരങ്ങളും, അപേക്ഷാ ഫോറങ്ങളുടെ മാതൃകയും ഇടുക്കി ഐ.റ്റി.ഡി.പ്രോജക്ട് ഓഫീസ്, പൂമാല/പീരുമേട്/കട്ടപ്പന/ഇടുക്കി ട്രൈബൽ എക്സ്റ്റൻഷൻ ഓഫീസുകളിലും ലഭിക്കും. നിശ്ചിത മാതൃകയിലുള്ള പൂരിപ്പിച്ച അപേക്ഷ, ജാതി, വരുമാന സർട്ടിഫിക്കറ്റുകൾ, നിലവിൽ പഠിക്കുന്ന സ്‌കൂളിൽ നിന്നും ലഭിക്കുന്ന ഗ്രേഡ് റിപ്പോർട്ട് എന്നിവ സഹിതം പ്രമോട്ടർമാർ മുഖേനയോ നേരിട്ടോ പ്രോജക്ട് ഓഫീസർ/ജില്ലാ പട്ടികജാതി വികസന ഓഫീസർ, ബന്ധപ്പെട്ട ട്രൈബൽ എക്സ്റ്റൻഷൻ ഓഫീസുകളിലോ അയയ്‌ക്കേണ്ടതാണ്. അപേക്ഷ സമർപ്പിക്കുന്നതിനുള്ള അവസാന തിയതി ഫെബ്രുവരി 28 വൈകിട്ട് 5 മണി വരെ. ഫോൺ: 04862 222399