ഇടുക്കി:സാമ്പത്തിക വർഷം അവസാനിക്കാൻ രണ്ട് മാസം മാത്രം അവശേഷിക്കെ ജില്ലയിലെ പദ്ധതി നിർവ്വഹണം പൂർണ്ണതയിലെത്തിക്കാൻ ജനപ്രതിനിധികളും ഉദ്യോഗസ്ഥരും കാര്യക്ഷമമായി പ്രവർത്തിക്കണമെന്ന് ജില്ലാ പഞ്ചായത്ത് പ്രസിഡന്റ് ജിജി.കെ.ഫിലിപ്പ്. ഓൺലൈനായി ചേർന്ന ജില്ലാ ആസൂത്രണ സമിതി യോഗത്തിൽ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം.ജില്ലയിൽ ഏറ്റവും മികച്ച വികസന രേഖ തയ്യാറാക്കുന്ന പഞ്ചായത്തിന് പുരസ്‌കാരം നല്കുമെന്നും പ്രസിഡന്റ് പറഞ്ഞു. ജില്ലാ കളക്ടർ ഷീബ ജോർജ് ആമുഖ പ്രഭാഷണം നടത്തി. സംസ്ഥാനത്ത് ഗ്രാമപഞ്ചായത്തുതലത്തിൽ ഫണ്ട് വിനിയോഗത്തിൽ നിലവിൽ മൂന്നാം സ്ഥാനത്തുള്ള വട്ടവട ഗ്രാമ പഞ്ചായത്തിനെയും ബ്ലോക്ക് തലത്തിൽ രണ്ടാം സ്ഥാനത്തുള്ള ഇളംദേശം ബ്ലോക്ക് പഞ്ചായത്തിനെയും അഭിനന്ദിച്ചു. ജില്ലയിൽ നിർമ്മാണ സാമഗ്രികളുടെ ലഭ്യത കുറവുമായി ബന്ധപ്പെട്ട പ്രശ്‌നങ്ങൾ പരിഹരിച്ച ജില്ലാ കളക്ടറെ ആസൂത്രണ സമിതി യോഗം അഭിനന്ദിച്ചു. ജില്ലാ പഞ്ചായത്ത് വൈസ് പ്രസിഡന്റ് ഉഷാകുമാരി മോഹൻകുമാർ, ആസൂത്രണ സമിതി അംഗങ്ങൾ, തദ്ദേശഭരണ സ്ഥാപന അധ്യക്ഷൻമാർ, സെക്രട്ടറിമാർ, ജില്ലാ പ്ലാനിംഗ് ഓഫീസർ ഡോ.സാബു വർഗീസ്, ഗവ. നോമിനി കെ.ജയ, ജില്ലാതല ഉദ്യോഗസ്ഥർ തുടങ്ങിയവർ യോഗത്തിൽ പങ്കെടുത്തു.