ഇടുക്കി: കാഞ്ചിയാർ കീച്ചേരി മുതൽ പുതിയപാലം വരെയുള്ള തോടിന്റെ ഇരുകരകളിലും കയർഭൂവസ്ത്രം ഉപയോഗിച്ചുള്ള സംരക്ഷണഭിത്തിയുടെ നിർമ്മാണം ആരംഭിച്ചു. പരിപാടിയുടെ ഉദ്ഘാടനം ഗ്രാമപഞ്ചായത്ത് പ്രസിഡണ്ട് സുരേഷ് കുഴിക്കാട്ട് നിർവഹിച്ചു. പഞ്ചായത്ത് അംഗം സന്ധ്യാ ജയന്റെ അദ്ധ്യക്ഷത വഹിച്ചു. മണ്ണിടിച്ചിൽ തടയാൻ കോൺക്രീറ്റിനു പകരമായാണ് കയർ ഭൂവസ്ത്രം കൊണ്ടുള്ള പരിസ്ഥിതി സൗഹൃദഭിത്തി നിർമ്മിക്കുന്നത്. കയർ വസ്ത്രം പിടിച്ചുനിർത്താൻ മുളയാണികളാണ് ഉപയോഗിക്കുന്നത് . ഇതിനുമുകളിൽ അനുയോജ്യമായ പുല്ലോ ചെടിയോ നട്ടുപിടിപ്പിക്കാനാണ് ഉദ്ദേശിക്കുന്നത് . തോടുകൾ, നീർച്ചാലുകൾ, കുളങ്ങൾ, തീരപ്രദേശങ്ങൾ എന്നിവയുടെ സംരക്ഷണം, മണ്ണൊലിപ്പ് തടയൽ, ചരിവുപ്രദേശത്തെ കൃഷി, ബണ്ട് നിർമാണം തുടങ്ങിയ ആവശ്യങ്ങൾക്കും കയർ ഭൂവസ്ത്രം ഫലപ്രദമാണ്. പ്രകൃതി സംരക്ഷണത്തോടൊപ്പം കയർ വ്യവസായത്തെ ശക്തിപ്പെടുത്തുക എന്നതുകൂടിയാണ് പദ്ധതിയിലൂടെ ലക്ഷ്യമിടുന്നത്. തൊഴിലുറപ്പ് തൊഴിലാളികൾക്ക് കൂടുതൽ തൊഴിൽ ദിനങ്ങൾ നൽകാനും പദ്ധതി സഹായകമാവുന്നുണ്ട്. ലബ്ബക്കട വാർഡിൽ നടപ്പിലാക്കുന്ന പദ്ധതിയിൽ 310 തൊഴിൽ ദിനങ്ങളാണ് എസ്റ്റിമേറ്റ് ചെയ്തിട്ടുള്ളത്. പരിപാടിയിൽ പഞ്ചായത്ത് അംഗങ്ങളായ ഷിജി സിബി മാളവന, ജോമോൻ തെക്കേൽ, ലിനു ജോസ്, റോയ് എവറസ്റ്റ്, ജീവനക്കാരായ സീമ രാജേഷ്, മെഡുലാമ്മ, ജിബിൻ, തുടങ്ങിയവർ പങ്കെടുത്തു.