തൊടുപുഴ: കാൽ വഴുതി കിണറ്റിൽ വീണ യുവാവിനെ അഗ്നിരക്ഷാ സേന രക്ഷപ്പെടുത്തി. കോടിക്കുളം തലക്കാമ്പുറം തുരുത്തേൽ വീട്ടിൽ അജിത്താണ് (21) കാൽ വഴുതി കിണറ്റിൽ വീണത്. ചുറ്റുമതിലില്ലാത്ത കിണറിൽ വലയിട്ടുണ്ടായിരുന്നു. ഇത് അജിത്ത് ശ്രദ്ധിച്ചിരുന്നില്ല. 35 അടി താഴ്ചയാണ് കിണറിനുണ്ടായിരുന്നത്. നാട്ടുകാർ ഉടൻ തൊടുപുഴ അഗ്‌നി രക്ഷാ സേന ഓഫീസിൽ വിവരമറിയിക്കുകയായിരുന്നു. സേനാംഗങ്ങളായ അൻവർ ഷാൻ, ജിഷ്ണു എന്നിവർ കിണറ്റിൽ ഇറങ്ങി സ്ട്രെക്ച്ചറിൽ കയറ്റി അജിത്തിനെ മുകളിൽ എത്തിച്ച് സേനയുടെ ആംബുലൻസിൽ സെന്റ് മേരിസ് ഹോസ്പിറ്റലിൽ എത്തിച്ചു. കാലിൽ പരിക്കേറ്റതിനാൽ ഏറെ സാഹസികമായാണ് ഇവർ അജിത്തിനെ മുകളിലെത്തിച്ചത്. അസിസ്റ്റന്റ് സ്റ്റേഷൻ ഓഫീസർ (ഗ്രേഡ്) ടി.ഇ. അലിയാർ, ഫയർ ആൻഡ് റെസ്‌ക്യൂ ഓഫീസർമാരായ ജിനീഷ് കുമാർ, സജാദ്, അൻവർഷാൻ, മുബാറക്ക്, ജിഷ്ണു, അഭിലാഷ്, വിജിൻ എന്നിവർ രക്ഷാ പ്രവർത്തനത്തിൽ പങ്കെടുത്തു.