കാസർകോട്: ഐ.എ.എസിലും ഐ.പി.എസിലും ഉന്നത വിജയം നേടിയവരെ നേരിൽ കണ്ട ആകാംക്ഷയിലും അവർ പകർന്ന് നൽകിയ അറിവിന്റെ ആഹ്ലാദത്തിലുമായിരുന്നു പരവനടുക്കം ചിൽഡ്രൻസ് ഹോമിലെ കുട്ടികൾ. ആത്മാർത്ഥമായ ആഗ്രഹവും ലക്ഷ്യത്തിലെത്താനുള്ള കഠിനമായ പരിശ്രമവും ഉണ്ടെങ്കിൽ ലോകം മുഴുവൻ അതിനായി കൂടെ നിൽക്കുമെന്ന് ബോധ്യപ്പെടുത്തി പ്രയാൺ പ്രൊജക്ടിന് ജില്ലയിൽ തുടക്കമായത് പരവനടുക്കം ചിൽഡ്രൻസ് ഹോമിൽ നിന്നാണ്.

ജീവിതത്തിൽ വിദ്യാഭ്യാസപരമായും തൊഴിൽപരമായും ഉന്നതിയിലെത്താനുള്ള നേർവഴികളെ കുറിച്ച് കുട്ടികൾ ഓരോരുത്തരും മികച്ച വിജയം നേടി ഐ.പി.എസ് സെലക്ഷൻ കിട്ടിയ നീലേശ്വരം ബങ്കളത്തെ സി. ഷെഹീനോട് ചോദിച്ചറിഞ്ഞു. കുട്ടികളുടെ സംശയങ്ങൾ തീർക്കാൻ പരിപാടി ഉദ്ഘാടനം ചെയ്ത ജില്ലാ കളക്ടർ ഭണ്ഡാരി സ്വാഗത് രൺവീർ ചന്ദും ഒന്നര മണിക്കൂറോളം ഒപ്പമുണ്ടായി.

ജില്ലാ ഇൻഫർമേഷൻ ഓഫീസർ എം. മധുസൂദനൻ അധ്യക്ഷത വഹിച്ചു. ചിൽഡ്രൻസ് ഹോം സൂപ്രണ്ട് ടി.കെ ഉസ്മാൻ സ്വാഗതവും ഡി.സി.പി.യു പ്രൊട്ടക്ഷൻ ഓഫീസർ എ.ജി ഫൈസൽ നന്ദിയും പറഞ്ഞു. വരും ആഴ്ചകളിലും വിവിധ മേഖലകളിലെ പ്രമുഖരെ പങ്കെടുപ്പിച്ച് പ്രയാൺ 2022 സംഘടിപ്പിക്കും.