ബാങ്ക് വായ്പ നൽകും

കണ്ണൂർ: സംസ്ഥാന ഊർജ്ജ വകുപ്പിനു കീഴിലുള്ള അനെർട്ട് നടപ്പിലാക്കി വരുന്ന ഗാർഹിക സൗരോർജ്ജ പ്ലാന്റുകളുടെ സ്‌പോട്ട് രജിസ്‌ട്രേഷനും ബോധവത്കരണവും 21,22,23 തിയ്യതികളിൽ അനെർട്ട് കണ്ണൂർ ജില്ലാ ഓഫിസിനു സമീപം അർബൻ ഹാളിൽ നടക്കും. സൗര തേജസ്സ് പദ്ധതിയുടെ ഭാഗമായി 2 കിലോ വാട്ട് മുതൽ 10 കിലോ വാട്ട് ശേഷി വരെ സ്ഥാപിക്കുന്ന സൗരോർജ്ജ പ്ലാന്റുകൾക്ക് 40 ശതമാനം വരെ സബ്‌സിഡി ലഭിക്കും. പദ്ധതിയുടെ കാമ്പയിൻ പാർട്ട്ണറായ ഊർജ്ജമിത്ര കേന്ദ്രങ്ങൾ ജില്ലയിലെ വിവിധ സ്ഥലങ്ങളിലായും രജിസ്‌ട്രേഷൻ നടത്തുന്നുണ്ട്.

ഊർജ്ജമിത്ര കല്ല്യാശ്ശേരി 21 ന് കണ്ണപുരം ഗ്രാമപഞ്ചായത്തിലും 22 ന് മാടായി ഗ്രാമപഞ്ചായത്തിലും 23 ന് കടന്നപ്പളളി പാണപ്പുഴ ഗ്രാമപഞ്ചായത്തിലും ഊർജ്ജമിത്ര അഴീക്കോട് 21, 22 തീയതികളിൽ അഴീക്കോട് സർവീസ് സെന്ററിൽ വച്ചും 23 ന് നാറാത്ത് ഗ്രാമപഞ്ചായത്തിൽ വച്ചും ഊർജ്ജമിത്ര പയ്യന്നൂർ 21,22,23 തിയ്യതികളിൽ സർവീസ് സെന്ററിൽ വച്ചും, ഊർജ്ജമിത്ര മട്ടന്നൂർ 23 ന് ഇരിട്ടി താലൂക്ക് ഓഫീസിന് സമീപത്ത് വച്ചും സ്‌പോട്ട് രജിസ്‌ട്രേഷൻ നടത്തും.

വിശദവിവരങ്ങൾ നേരിട്ട് മനസ്സിലാക്കാനും രജിസ്​റ്റർ ചെയ്യാനും ഇഷ്ടമുള്ള ഡെവലപ്പറെ തിരഞ്ഞെടുക്കാനും സ്‌പോട്ട് രജിസ്ട്രേഷൻ മുഖേനെ അവസരം ലഭിക്കും. രജിസ്​റ്റർ ചെയ്യാൻ താല്പര്യമുള്ളവർക്ക് ഇലക്ട്രിസി​റ്റി ബില്ല്, ആധാർ കാർഡ്, അഡ്വാൻസ് തുകയായ 1180 രൂപ എന്നിവ സഹിതം സ്‌പോട്ട് രജിസ്‌ട്രേഷനിൽ പങ്കെടുക്കാം. കൂടുതൽ വിവരങ്ങൾക്ക് അനെർട്ട് ജില്ലാ ഓഫീസ് 0497 2700051, 9188119413 ഊർജ്ജമിത്ര കല്യാശ്ശേരി 7025981361, ഊർജ്ജമിത്ര അഴീക്കോട് 9604385661, ഊർജ്ജമിത്ര മട്ടന്നൂർ 9188592492 , ഊർജ്ജമിത്ര പയ്യന്നൂർ 6238502900 എന്നീ നമ്പറുകളിൽ ബന്ധപ്പെടാം.