പേരാമ്പ്ര : നരയംകുളം തച്ചറോത്ത് ശശിയുടെ മകൻ കണ്ണൂർ തോട്ടട ഗവ: പോളിടെക്നിക്കിൽ മൂന്നാം വർഷ വിദ്യാർത്ഥി
അശ്വന്തി (20)ന്റെ ദുരൂഹ മരണം ക്രൈം ബ്രാഞ്ച് അന്വേഷിക്കണമെന്നാവശ്യപ്പെട്ട് ആക്ഷൻ കമ്മിറ്റി കണ്ണൂർ സിറ്റി പൊലീസ് കമ്മീഷണർ ആർ. ഇളങ്കോ ഐ.പി.എസിന് നിവേദനം നൽകി. ആക്ഷൻ കമ്മിറ്റി ചെയർ പേഴ്സനും വാർഡ് മെമ്പറുമായ ടി.പി. ഉഷ, സി.പി.എം ലോക്കൽ കമ്മിറ്റി സെക്രട്ടറി ടി. ഷാജു എന്നിവരുടെ നേതൃത്വത്തിലാണ് നിവേദനം നൽകിയത്. ലോക്കൽ പൊലീസിന്റെ അന്വേഷണ വിവരം ക്രൈം ബ്രാഞ്ചിന് കൈമാറുമെന്നും ശേഷം ക്രൈംബ്രാഞ്ച് അന്വേഷണമാവാമെന്നും കമ്മീഷണർ ഉറപ്പ് നൽകി.

കണ്ണൂർ തോട്ടട ഗവ: പോളിടെക്നിക്കിൽ മൂന്നാം വർഷ വിദ്യാർത്ഥിയായിരുന്ന അശ്വന്തിനെ കഴിഞ്ഞ ഡിസംബർ 1 നാണ് ഹോസ്റ്റലിൽ തൂങ്ങിമരിച്ച നിലയിൽ കണ്ടെത്തിയത്. ആത്മഹത്യ ചെയ്യാൻ യാതൊരു സാഹചര്യവും നിലവിലില്ലെന്നിരിക്കെ മരണത്തിൽ വലിയ ദുരൂഹതയുണ്ടെന്നാണ് നിവേദനത്തിൽ പറയുന്നത്. ഒന്നാം വർഷ വിദ്യാർത്ഥികൾക്ക് വേണ്ടി ഒരുക്കിയ മുറിയിലെ ഫാനിലാണ് അശ്വന്ത് കെട്ടി തൂങ്ങിയതായി പറയുന്നത്. ഫാനിൽ നിന്ന് അഴിച്ചു കിടത്തിയവർ ആശുപത്രിയിൽ എത്തിക്കാൻ ശ്രമിച്ചില്ലെന്നുംം പറയുന്നു.മരിക്കുന്ന ദിവസം രാത്രി ഹോസ്റ്റലിലെ ഒരു വിദ്യാർത്ഥിക്ക് തലക്ക് മുറിവേറ്റിരുന്നു. ഇതിന്റെകാരണത്തെ കുറിച്ചും അന്വേഷിക്കണമെന്നും ആക്ഷൻ കമ്മിറ്റി ആവശ്യപ്പെട്ടു.