കോഴിക്കോട്: 'കൗരവ പക്ഷത്തേക്കായിരിക്കണം അമ്പുകളെയ്യേണ്ടത്... അല്ലാതെ സ്വന്തം പടയുടെ നേർക്കല്ല'; പ്രതിപക്ഷ നേതാവിന്റെ വസതിയിൽ ഗ്രൂപ്പ് യോഗം ചേർന്നെന്ന വാർത്തയെ പരാമർശിച്ച് കെ.മുരളീധരൻ എം.പി പറഞ്ഞു. കോൺഗ്രസിനെ എങ്ങനെയെങ്കിലും രക്ഷപ്പെടുത്താൻ നോക്കുന്നതിനു പകരം സ്വന്തം താത്പര്യങ്ങൾ സംരക്ഷിക്കാനല്ല ഇപ്പോൾ ശ്രമിക്കേണ്ടതെന്നും മുരളീധരൻ പറഞ്ഞു. ഡി.സി.സി ഹാളിൽ പി.ശങ്കരൻ അനുസ്മരണച്ചടങ്ങിൽ സംസാരിക്കുകയായിരുന്നു അദ്ദേഹം. ഉച്ച വരെ റഷ്യ - യുക്രൈൻ യുദ്ധമാണ് മാദ്ധ്യമങ്ങളിലെ പ്രധാന ചർച്ചയെങ്കിൽ പിന്നീട് അതിന്റെ സ്ഥാനത്ത് കോൺഗ്രസിലെ യുദ്ധമായി. പാർട്ടിയാണ് വലുതെന്ന് എല്ലാവരും ഓർക്കണം. കൂട്ടായ നേതൃത്വമാണ് ഇപ്പോൾ ആവശ്യം. പഴയ കാലത്ത് ഗ്രൂപ്പ് കളിക്കുമ്പോഴെല്ലാം ഭരണവും അധികാരവുമുണ്ടായിരുന്നു. സ്‌പോട്‌സ്‌മാൻസ്പിരിറ്റുമുണ്ടായിരുന്നു .ആദ്യം അധികാരം കിട്ടട്ടെ. എന്നിട്ടാവാം ആർക്കൊക്കെ ഏതൊക്കെ സ്ഥാനം വേണമെന്നു തീരുമാനിക്കാൻ-മുരളി പറഞ്ഞു.