കോട്ടയം: 15 മുതൽ 18 വയസുവരെയുള്ള കുട്ടികളുടെ രണ്ടാം ഡോസ് വാക്‌സിനേഷൻ മൂന്ന് മുതൽ ആരംഭിക്കുമെന്ന് ജില്ലാ കളക്ടർ അറിയിച്ചു. ആദ്യ ഡോസ് കൊവാക്‌സിൻ സ്വീകരിച്ചവർക്ക് 28 ദിവസമായാൽ രണ്ടാം ഡോസ് സ്വീകരിക്കാം. ജനുവരി മൂന്നിനാണ് കുട്ടികളുടെ വാക്‌സിനേഷൻ ആരംഭിച്ചത്. ജില്ലയിൽ ഇതുവരെ 81,514 കുട്ടികൾ വാക്‌സിൻ സ്വീകരിച്ചു. ശേഷിച്ച കുട്ടികൾ എത്രയും വേഗം ഒന്നാം ഡോസ് സ്വീകരിക്കണമെന്ന് ജില്ലാ കളക്ടർ പറഞ്ഞു. കൊവിഡ് ബാധിച്ചതുമൂലം വാക്‌സിൻ എടുക്കാൻ കഴിയാത്തവർക്ക് രോഗ മുക്തിനേടി മൂന്നു മാസം കഴിഞ്ഞേ അടുത്ത ഡോസ് സ്വീകരിക്കാൻ കഴിയൂ.