കട്ടപ്പന: കർഷക വിലാപത്തിന് ചെവികൊടുക്കാത്ത ബഡ്ജറ്റാണ് കേന്ദ്രധനകാര്യ മന്ത്രി അവതരിപ്പിച്ചതെന്ന് ചെറുകിട തേയില കർഷക ഫെഡറേഷൻ. 2022ൽ കർഷകരുടെ വരുമാനം ഇരട്ടിയായി വർദ്ധിപ്പിക്കുമെന്ന് പ്രഖ്യാപിച്ച പ്രധാനമന്ത്രിയുടെ വാക്കുകൾ വെറും ജലരേഖയായി മാറി. വിശ്വാസം നഷ്ടപ്പെട്ട കേന്ദ്രബഡ്ജറ്റ് നിരാശജനകമാണെന്ന് ഫെഡറേഷൻ പ്രസിഡന്റ് വൈ.സി സ്റ്റീഫൻ പറഞ്ഞു. തേയില വ്യവസായത്തെയും കർഷകരെയും സംരക്ഷിക്കാൻ കഴിഞ്ഞ ബഡ്ജറ്റിൽ 353.65 കോടി രൂപ നീക്കി വച്ചിരുന്നു. ഇപ്പോൾ പ്രഖ്യാപിച്ച ബഡ്ജറ്റിൽ വെറും 131.92 കോടി രൂപ മാത്രം. 222 കോടിയുടെ കുറവാണ് വരുത്തിയിരിക്കുന്നത്. കാർഷിക മേഖലയ്ക്ക് ലഭിക്കേണ്ട തുകയാണ് കൂടുതലും വെട്ടിക്കുറച്ചിരിക്കുന്നത്.