മുണ്ടക്കയം : 63 വർഷമായി ആശുപത്രി മുപ്പത്തിയഞ്ചാംമൈലിൽ വാടക കെട്ടിടത്തിൽ പ്രവർത്തിക്കുന്ന മൃഗാശുപത്രിയ്ക്ക് പുതിയ കെട്ടിടമൊരുങ്ങുന്നു. 60 ലക്ഷം രൂപയാണ് ഇതിനായി സർക്കാർ അനുവദിച്ചിരിക്കുന്നത്. 1959 മുതൽ പ്രവർത്തിച്ചുവരുന്ന മൃഗാശുപത്രി കെട്ടിടം നിലംപതിക്കാവുന്ന അവസ്ഥയിലാണ്. മാസങ്ങളായി വാടകക്കുടിശിക നൽകാത്തതിനാൽ കെട്ടിടം ഒഴിയണമെന്ന് ഉടമ ആവശ്യപ്പെട്ടിരുന്നു. വളർത്തുമൃഗങ്ങളെ മാത്രം ആശ്രയിച്ച് കഴിയുന്ന നിരവധി കർഷകരുള്ള പെരുവന്താനം മേഖലയിൽ മൃഗാശുപത്രി ആവശ്യമാണെന്നും കെട്ടിടത്തിനായി തുക അനുവദിക്കണമെന്നും മന്ത്രി ചിഞ്ചുറാണിയ്ക്ക് വാഴൂർ സോമൻ എം.എൽ.എ നിവേദനം നൽകിയിരുന്നു. പെരുവന്താനം പഞ്ചായത്ത് ഓഫീസിന്റെ സമീപത്തായാണ് പുതിയ കെട്ടിടം ഉയരുക.