എരുമേലി : മത്സ്യഫെഡിന്റെ സഹകരണത്തോടെ പാറക്കുളത്തിൽ മത്സ്യകൃഷിയൊരുക്കി എരുമേലി ഗ്രാമപഞ്ചായത്ത്. ആറാം വാർഡിൽ കൊടിത്തോട്ടം പ്രദേശത്ത് ഉപയോഗശൂന്യമായി കിടന്ന പാറക്കുളമാണ് മത്സ്യ കുളമാക്കി മാറ്റിയത്. ഏരുമേലി പഞ്ചായത്ത് പ്രസിഡന്റ് തങ്കമ്മ ജോർജ്കുട്ടി മത്സൃകൃഷി ഉദ്ഘാടനം ചെയ്തു. ആദ്യഘട്ടമായി വിവിധ ഇനത്തിലുള്ള 500 ഓളം മത്സ്യകുഞ്ഞുങ്ങളെ കുളത്തിൽ നിക്ഷേപിച്ചു. കുളത്തിന്റെ അറ്റകുറ്റപ്പണികൾ പൂർത്തിയാക്കി രണ്ടാം ഘട്ടത്തിൽ കൂടുതൽ മത്സ്യകുഞ്ഞുങ്ങളെ നിക്ഷേപിക്കും. പ്രദേശത്തെ കുടുംബശ്രീ പ്രവർത്തകർക്കാണ് മത്സ്യകുഞ്ഞുങ്ങളുടെയും, പാറക്കുളത്തിന്റെയും പരിപാലന ചുമതല. വളർച്ചയെത്തുന്ന മത്സ്യങ്ങളെ കുടുംബശ്രീ മുഖേന വിപണിയിൽ എത്തിക്കും. കുടുംബശ്രീയ്ക്ക് വരുമാനമാർഗമായും പദ്ധതി പ്രയോജനപ്പെടും.