കോട്ടയം: എസ്.എൻ.ഡി.പി യോഗം വിജയപുരം 1306ാം നമ്പർ ശാഖാ ഞാറയ്ക്കൽ ശ്രീനാരായണ ഗുരുദേവ ശാസ്താ ക്ഷേത്രത്തിൽ എട്ടാമത് ഉത്സവം 28 മുതൽ മാർച്ച് 4 വരെ നടക്കും. ഇന്ന് രാവിലെ 7ന് എല്ലാ വീടുകളിലും പീതപതാക ഉയർത്തൽ, 7.30ന് കുടുംബയോഗ ആസ്ഥാനത്ത് പീത പതാക ഉയർത്തൽ, 8ന് ശാഖാ ആസ്ഥാനത്ത് ശാഖാ പ്രസിഡന്റ് അനൂപ് സോമൻ പതാക ഉയർത്തും, 8.30ന് ഉത്സവ ദീക്ഷാ ചടങ്ങ്, ഭദ്രദീപപ്രകാശനം ക്ഷേത്രം മേൽശാന്തി പള്ളിപ്പുറം സുമേഷ് ശാന്തി. 28 മുതൽ 4 വരെ പതിവ് ക്ഷേത്രപൂജകൾ.

28ന് രാവിലെ 11.10നും 12.30നും മദ്ധ്യേ അലങ്കാര ഗോപുരം, ബലിക്കല്ല് സമർപ്പണ പൂജ, വൈകിട്ട് 5.30നും 6.30നും മദ്ധ്യേ ക്ഷേത്രം തന്ത്രി ശ്രീസൂര്യനാരായണ ഗുരുകുല വൈദിക മഠത്തിലെ കോത്തല കെ.വി വിശ്വനാഥൻ തന്ത്രിയുടെയും ക്ഷേത്രം മേൽശാന്തി പള്ളിപ്പുറം സുമേഷ് ശാന്തികളുടെയും മുഖ്യകാർമ്മികത്വത്തിൽ കൊടിയേറ്റ്. വൈകിട്ട് 7ന് സമ്മേളന ഉദ്ഘാടനവും അലങ്കാര ഗോപുര സമർപ്പണവും ശിവഗിരി ശ്രീനാരായണ ധർമ്മസംഘം ട്രസ്റ്റ് ട്രഷറാർ സ്വാമി ശാരദാനന്ദ നിർവഹിക്കും. ശാഖാ പ്രസിഡന്റ് അനൂപ് സോമൻ അദ്ധ്യക്ഷത വഹിക്കും. ആലുവ അദ്വൈതാശ്രമം സെക്രട്ടറി സ്വാമി ധർമ്മചൈതന്യ അനുഗ്രഹപ്രഭാഷണം നടത്തും. ആദരിക്കൽ ചടങ്ങ് യൂണിയൻ സെക്രട്ടറി ആർ.രാജീവും നമസ്‌കാര മണ്ഡപവും ബലിക്കല്ല് സമർപ്പണവും യൂണിയൻ വൈസ് പ്രസിഡന്റ് വി.എം ശശിയും വിദ്യാഭ്യാസ അവാർഡ് വിതരണവും സ്‌കോളർഷിപ്പ് വിതരണവും യോഗം ബോർഡ് മെമ്പർ അഡ്വ.ശാന്താറാം റോയി തോളൂരും നിർവഹിക്കും. കെ.സി സോമൻ, ബിന്ദു മോഹൻ, അനന്തു കെ. പുഷ്‌കരൻ എന്നിവർ പങ്കെടുക്കും. ശാഖാ സെക്രട്ടറി വി.എസ് ഷിനുമോൻ സ്വാഗതവും വൈസ് പ്രസിഡന്റ് ബിനു പി.മണി നന്ദിയും പറയും. രാത്രി 9ന് കൊടിയേറ്റ് സദ്യ.

മാർച്ച് 1ന് ഉച്ചക്ക് 12ന് പ്രസാദമൂട്ട്, വൈകിട്ട് 7ന് രവിവാര പാഠശാല കുട്ടികളുടെ കലാപരിപാടികൾ. 2ന് രാവിലെ 11.35ന് ചതയപ്രാർത്ഥന, 12ന് പ്രസാദമൂട്ട്, വൈകിട്ട് 7.30ന് കരോക്കേ ഗാനമേള. 3ന് ഉച്ചക്ക് 12ന് പ്രസാദമൂട്ട്, 6ന് നെയ്യ് വിളക്ക്, വൈകിട്ട് 7.30ന് തിരുവാതിരകളി, 8ന് ആനന്ദനടനം. 4ന് രാവിലെ 8ന് പന്തീരടിപൂജ, 9ന് ശതകലശപൂജ, 12.30ന് മഹാപ്രസാദമൂട്ട്, വൈകിട്ട് 4ന് നടതുറക്കൽ, താലപ്പൊലിഘോഷയാത്ര, 6.30ന് താലം അഭിഷേകം, വൈകിട്ട് 7.30ന് മ്യൂസിക്കൽ കോമഡി ഫിഗർ നൈറ്റ്, 8.15ന് കൊടിയിറക്ക്.