പാലാ: നഗരത്തിലെ വ്യാപാരികൾക്ക് വ്യാപാര വ്യവസായ സ്ഥാപനങ്ങളുടെ ലൈസൻസ് അവരവരുടെ വീട്ടിൽ ഇരുന്നോ, സ്ഥാപനങ്ങളിൽ ഇരുന്നോ ഓൺലൈനായി ചെയ്യുന്നതിനുള്ള ആദ്യ ചുവടുവയ്പ്പ് പാലാ നഗരസഭ ഈ വർഷം മുതൽ ആരംഭിച്ചതായി നഗരസഭാ ചെയർമാൻ ആന്റോ പടിഞ്ഞാറേക്കര അറിയിച്ചു. വ്യാപാരികളുടെ പാസ്‌പോർട്ട് സൈസ് ഫോട്ടോ, ആധാർ കാർഡ്, മുൻകാല ലൈസൻസ് രസീത്, തൊഴിൽ കരം അടച്ച രസീത്, ബിൽഡിംഗ് ടാക്‌സ് പകർപ്പ്, നഗരസഭയിലെ കെട്ടിടത്തിൽ വ്യാപാരം നടത്തുന്നവർ വാടകഅടച്ച രസീതിയുടെ പകർപ്പ് എന്നിവ ഒറ്റതവണ ഓൺലൈനിൽ രജിസ്റ്റർ ചെയ്ത് സേവനം പ്രയോജനപ്പെടുത്താം. ഇതിനോടനുബന്ധിച്ച് ലൈസൻസ് പുതുക്കൽ മേള ഇന്നും നാളെയും പാലാ മുനിസിപ്പൽ ടൗൺ ഹാളിൽ രാവിലെ 10 മുതൽ 4 വരെ നടത്തും. നഗരത്തിലെ അക്ഷയകേന്ദ്രങ്ങളിലെയും, ജനസേവന കേന്ദ്രങ്ങളിലെയും പ്രതിനിധികളും നഗരസഭയിലെ ആരോഗ്യവിഭാഗം ഉദ്യോഗസ്ഥരുടെയും റവന്യു വിഭാഗം ഉദ്യോഗസ്ഥരുടെയും സേവനം ഉണ്ടായിരിക്കുമെന്നും ചെയർമാൻ പറഞ്ഞു.. വ്യാപാരികൾ അവസരം പ്രയോജനപ്പെടുത്തണമെന്ന് നഗരസഭാ ചെയർമാൻ ആന്റോ ജോസ് പടിഞ്ഞാറെക്കര, വൈസ് ചെയർപേഴ്‌സൺ സിജി പ്രസാദ്,​ ആരോഗ്യ സ്റ്റാൻന്റിംഗ് കമ്മിറ്റി ചെയർമാൻ ബൈജു കൊല്ലംപറമ്പിൽ തുടങ്ങിയവർ അറിയിച്ചു.