കൊച്ചി:പ്രൈം വോളിബോൾ ലീഗിലെ ആദ്യ പതിപ്പിൽ കൊച്ചി ബ്ലൂ സ്‌പൈക്കേഴ്സ് ക്യാപ്‌റ്റനായി മിഡിൽ ബ്ലോക്കർ കാർത്തിക്കിനെ തിരഞ്ഞെടുത്തു. ഹൈദരാബാദിലെ ഗച്ചിബൗളി ഇൻഡോർ സ്‌റ്റേഡിയത്തിൽ ഫെബ്രുവരി 5നാണ് മത്സരങ്ങൾ ആരംഭിക്കുന്നത്.

2021 സെപ്‌തംബറിൽ ജപ്പാനിൽ നടന്ന ഏഷ്യൻ മെൻസ് വോളിബോൾ ചാമ്പ്യൻഷിപ്പിൽ ഇന്ത്യയുടെ നായകനായിരുന്ന കാർത്തിക് 2016ലാണ് ആദ്യമായി ദേശീയ തലത്തിൽ കളിച്ചത്. താരലേലത്തിൽ 15 ലക്ഷം രൂപയ്ക്കാണ് കൊച്ചി ബ്ലൂ സ്‌പൈക്കേഴ്സ് 27 കാരനായ കാർത്തിക്കിനെ സ്വന്തമാക്കിയത്.

പ്രൈം വോളിബോൾ ലീഗിന്റെ ആദ്യ എഡിഷനിൽ കൊച്ചി ബ്ലൂ സ്‌പൈക്കേഴ്സിനെ നയിക്കാൻ തെരഞ്ഞെടുത്തതിൽ ഏറെ അഭിമാനമുണ്ടെന്ന് കാർത്തിക് പറഞ്ഞു. പരിചയസമ്പന്നരും പുതുമുഖങ്ങളും അടങ്ങുന്ന ടീമിനെ നയിക്കാൻ അവസരം നൽകിയതിനും തന്നിൽ വിശ്വാസം അർപ്പിച്ചതിലും ടീം ഉടമസ്ഥരോടും കോച്ചിനോടും നന്ദിയുണ്ട്. ടീം അംഗങ്ങൾ എല്ലാവരും തന്നെ കഠിന പ്രയത്നത്തിലാണെന്നും ലീഗിൽ മികച്ച പ്രകടനം കാഴ്ചവെയ്ക്കാനാകുമെന്ന ഉറച്ച വിശ്വാസമുണ്ടെന്നും കാർത്തിക് വ്യക്തമാക്കി.

ഇന്ത്യൻ വോളിബോൾ ടീം നായകനെന്ന നിലയിൽ കാർത്തിക് കൈവരിച്ചിട്ടുള്ള നേട്ടങ്ങൾ കൊച്ചി ബ്ലൂ സ്‌പൈക്കേഴ്സിന് മുതൽക്കൂട്ടാകുമെന്ന് ടീമിന്റെ മുഖ്യ പരിശീലകനായ എം.എച്ച്. കുമാര അഭിപ്രായപ്പെട്ടു.

ഫെബ്രുവരി 5ന് നടക്കുന്ന ഉദ്ഘാടന മത്സരത്തിൽ ഹൈദരാബാദ് ബ്ലാക് ഹോക്‌സിനെയാണ് കൊച്ചി ബ്ലൂ സ്‌പൈക്കേഴ്സ് നേരിടുക. മത്സരങ്ങൾ സോണി ലൈവ് ഉൾപ്പെടെ സോണി നെറ്റ്‌വർക്കിൽ തത്സമയം സംപ്രേഷണം ചെയ്യും.