കൊച്ചി: വീട്ടിൽ മദ്യവിൽപ്പന നടത്തിയതിന് ചേരാനെല്ലൂർ ഇടയക്കുന്നം നെടിയത്തറ വീട്ടിൽ ബൈജു (42)വിനെ എറണാകുളം റേഞ്ച് എക്‌സൈസ് അറസ്റ്റ് ചെയ്തു. ഇൻസ്‌പെക്ടർ എം.എസ് ഹനീഫയുടെ നേതൃത്വത്തിലുള്ള ഷാഡോ സംഘം വീട്ടിൽ നിന്ന് 136 കുപ്പികളിലായി 68 ലിറ്റർ മദ്യം പിടിച്ചെടുത്തു. ചേരാനെല്ലൂർ, ഇടയക്കുന്നം ഭാഗങ്ങളിൽ വൻതോതിൽ മദ്യം ശേഖരിച്ച് വിൽപ്പന നടത്തുന്നതായി ഷാഡോ ടീമിന് ലഭിച്ച വിവരത്തിന്റെ അടിസ്ഥാനത്തിൽ നടത്തിയ അന്വേഷണത്തിലാണ് ചേരാനെല്ലൂർ പാത്ഥസാരഥി ക്ഷേത്രത്തിനടുത്തുള്ള ഇയാളുടെ വീട്ടിൽ മദ്യശേഖരം കണ്ടെത്തിയത്. ആവശ്യക്കാരെന്ന വ്യാജേന സമീപിച്ച് കൈയ്യോടെ പിടികൂടുകയായിരുന്നു. ഇൻസ്‌പെക്ടർ രാമ പ്രസാദ്, പ്രിവന്റീവ് ഓഫീസർ ഋഷികേഷൻ, ഷാഡോ ടീംമംഗങ്ങളായ എൻ.ജി. അജിത് കുമാർ, എൻ.ഡി. ടോമി, സിവിൽ എക്‌സൈസ് ഓഫീസർ ജിതീഷ് , ജോമോൻ , അനീഷ്, യേശുദാസ് , പ്രമിത എന്നിവർ ചേർന്നാണ് പ്രതിയെ കസ്റ്റഡിയിൽ എടുത്തത്. കോടതിയിൽ ഹാജരാക്കി റിമാൻഡ് ചെയ്തു.