പയ്യോളി: പയ്യോളിയിൽ വ്യാജ വിദേശ മദ്യ വേട്ട , 130 ലിറ്റർ മദ്യം പിടിച്ചെടുത്തു.ഇന്നലെ പുലർച്ചെ 5.20 ഓടെയാണ് ഓട്ടോറിക്ഷയിൽ കാർഡ് ബോർഡ് പെട്ടികളിലാക്കി കടത്തുകയായിരുന്ന 260 കുപ്പി ഇന്ത്യൻ നിർമിത വ്യാജ വിദേശമദ്യം പയ്യോളി പൊലീസ് പിടികൂടിയത്. ഓട്ടോ ഉപേക്ഷിച്ച് ഡ്രൈവർ ഓടി രക്ഷപ്പെട്ടു. പൊലീസ് പരിശോധന ശ്രദ്ധയിൽ പെട്ടതിനെ തുടർന്ന് തിരിഞ്ഞു പോകാൻ ശ്രമിക്കുകയായിരുന്ന ഓട്ടോയെ പൊലീസ് തടയുകയായിരുന്നു. ഇതോടെ ഓട്ടോ ഉപേക്ഷിച്ച് ഡ്രൈവർ കടന്നുകളഞ്ഞു. തുടർന്നുള്ള പരിശോധനയിലാണ് കാർഡ് ബോഡ് പെട്ടികളിലായി സൂക്ഷിച്ച 500 മില്ലി ലിറ്ററിന്റെ 260 കുപ്പി അനധികൃത വിദേശമദ്യം കണ്ടെത്തിയത്. ഏകദേശം 80,000 രൂപയോളം വിപണി വില കണക്കാക്കുന്നു. മാഹി ഭാഗത്ത് നിന്നും കൊയിലാണ്ടി ഭാഗത്തേക്ക് KL 11 എ.എം 7233 ഓട്ടോയിൽ കൊണ്ടുവരിയായിരുന്ന മദ്യമാണ് പിടിച്ചത്. പയ്യോളി സി.ഐ. കെ.സി സുഭാഷ് ബാബുവിന്റെ നേതൃത്വത്തിൽ എസ് ഐ പി.എം സുനിൽകുമാർ,പി രമേശൻ, വി ജിജോ, കെ സുനിൽ, എം കെ ഷിജു എന്നിവരും സംഘത്തിലുണ്ടായിരുന്നു.