കണ്ണൂർ: പാ‌ർട്ടി വിലക്കിയ കടയിൽ നിന്ന് സാധനം വാങ്ങിച്ച യുവാവിനെ സി ഐ ടി യു തൊഴിലാളികൾ മർദ്ദിച്ചതായി പരാതി. കണ്ണൂർ മാതമംഗലത്ത് നോക്കുകൂലി തർക്കം നിലനിൽക്കുന്ന സ്ഥലത്താണ് സംഘ‌ർഷം നടന്നത്. അഫ്സലിനാണ് മ‌ർദ്ദനമേറ്റത്. നോക്കുകൂലി വിഷയവുമായി ബന്ധപ്പെട്ട് സി ഐ ടി യുക്കാർ ഒരു കടയിൽ നിന്ന് സാധനം വാങ്ങുന്നത് വിലക്കിയിരുന്നതായും എന്നാൽ അതേ കടയിൽ നിന്നും സാധനം വാങ്ങിയതിനാലാണ് തന്നെ മർദ്ദിച്ചതെന്ന് അഫ്സൽ പറഞ്ഞു. തലയ്ക്കും നെഞ്ചിനും സാരമായി പരിക്കേറ്റ യുവാവിനെ അഫ്സലിനെ മെഡിക്കൽ കോളേജിൽ പ്രവേശിപ്പിച്ചു.

പ്രജീഷ്, രഞ്ജിത്ത് എന്നിവരുടെ നേതൃത്വത്തിലുള്ള സംഘമാണ് ആക്രമിച്ചതെന്ന് അഫ്സൽ പറയുന്നു. അതേസമയം അഫ്സൽ സമരം പൊളിക്കാനെത്തിയതിനാലാണ് മർദ്ദിച്ചതെന്ന് യൂണിയൻ സെക്രട്ടറി വിശദീകരിച്ചു. ആശുപത്രിയിലെത്തിയ പൊലീസ് അഫ്സലിന്റെ മൊഴി രേഖപ്പെടുത്തുകയും കേസെടുക്കുകയും ചെയ്തിട്ടുണ്ട്.