മാനസിക അസ്വസ്ഥത പ്രകടിപ്പിച്ച യുവതിയെ പേരൂർക്കട മാനസികാരോഗ്യകേന്ദ്രത്തിലേക്ക് മാ​റ്റി

ചേർത്തല:ജോലി വാഗ്ദാനംചെയ്ത് ഒരുകോടിയിലധികം രൂപ തട്ടിപ്പു നടത്തിയ കേസിൽ പ്രധാന പ്രതിയായ ഇന്ദു(സാറ-35)വുമായുള്ള തെളിവെടുപ്പ് മുടങ്ങി. പൊലീസിന്റെ കസ്​റ്റഡിയിൽ വിട്ട ഇന്ദു കുഴഞ്ഞു വീഴുകയും അസ്വസ്ഥകൾ പ്രകടിപ്പിക്കുകയും ചെയ്തതിനെ തുടർന്ന് മജിസ്‌ട്രേറ്റിന് മുന്നിൽ ഓൺലൈനായി ഹാജരാക്കി പേരൂർക്കട മാനസികാരോഗ്യകേന്ദ്രത്തിലേക്ക് മാ​റ്റി. ഇവരെ പരിശോധിക്കുന്ന ഡോക്ടറുടെ നിർദ്ദേശം ലഭിച്ചതിനു ശേഷമായിരിക്കും നടപടി.
നേരത്തെ തന്നെ ഇവർ മാനസിക പ്രശ്‌നങ്ങൾക്ക് മരുന്നുകഴിച്ചിരുന്നതായി പൊലീസിന് മൊഴിനൽകിയിരുന്നു.ഇതിന്റെ സാഹചര്യത്തിൽ കസ്​റ്റഡിയിൽ വാങ്ങി ആദ്യ ദിനത്തിൽ തിരുവനന്തപുരത്ത് ഇവരെ പരിശോധിക്കുകയും ഡോക്ടറുടെ മുന്നിലെത്തിച്ച് വിവരങ്ങൾ ശേഖരിക്കുകയുംചെയ്തിരുന്നു.ഇതിനു ശേഷം ബുധനാഴ്ച രാവിലെ മുതലാണ് ഇവർ അസ്വസ്ഥതകൾ കാട്ടിതുടങ്ങിയതെന്ന് പൊലീസ് പറഞ്ഞു.ഇതോടെയാണ് കോടതിയെ അറിയിച്ച് ചികിത്സാ കേന്ദ്രത്തിലേക്ക് മാ​റ്റിയത്.
പൊതുമേഖലാ സ്ഥാപനങ്ങളിലും മാനേജ്‌മെന്റ് സ്‌കൂളുകളിലും ജോലി വാഗ്ദാനം ചെയ്ത് ഒരു കോടിയിലധികം രൂപ തട്ടിയ കേസിലെ പ്രധാന പ്രതിയായ തിരുവനന്തപുരം ജെ.എം.അപ്പാർട്ടുമെന്റിൽ രണ്ട് ഡി ഫ്ളാ​റ്റിൽ ഇന്ദു(സാറ-35)വിനെയും ഇടനിലക്കാരനായിരുന്ന ചേർത്തല നഗരസഭ 35ാം വാർഡ് മന്നനാട്ട് വീട്ടിൽ ശ്രീകുമാർ(53)നെയും കഴിഞ്ഞയാഴ്ചയണ് ചേർത്തല പൊലീസ് പിടികൂടിയത്.കേസിൽ കൂടുതൽ തെളിവുകൾ ശേഖരിക്കുന്നതിനായി ഇന്ദുവിനെ കോടതി നാലുദിവസം പൊലീസിന്റെ കസ്​റ്റഡിയിൽ വിട്ടിരുന്നു.