മുംബയ്: മുംബയിലെ മൂന്ന് ശതമാനം വിവാഹമോചനങ്ങൾക്കും കാരണം നഗരത്തിലെ ഗതാഗതക്കുരുക്കാണെന്ന വിചിത്ര പ്രസ്താവനയുമായി മഹാരാഷ്ട്ര മുൻമുഖ്യമന്ത്രിയും ബി.ജെ.പി നേതാവുമായ ദേവേന്ദ്ര ഫഡ്നാവിസിന്റെ ഭാര്യ അമൃത ഫഡ്നാവിസ്.

ഗതാഗതക്കുരുക്ക് കാരണം പല ഭർത്താക്കന്മാർക്കും വീടുകളിൽ ചെലവഴിക്കാൻ സമയം ലഭിക്കുന്നില്ല. ഇത് വിവാഹമോചനങ്ങളിലേക്ക് നയിക്കുന്നുണ്ടെന്നും മാദ്ധ്യമപ്രവർത്തകരോട് അമൃത ഫഡ്നാവിസ് പറഞ്ഞു.

'ഞാൻ ദേവേന്ദ്ര ഫഡ്നാവിസിന്റെ ഭാര്യയാണെന്ന കാര്യം മറക്കൂ. ഒരു സ്ത്രീ എന്ന നിലയിലാണ് നിങ്ങളോട് സംസാരിക്കുന്നത്. ഗതാഗതക്കുരുക്കുകളും റോഡുകളിലെ കുഴികളും ഞങ്ങളെ എങ്ങനെ ബുദ്ധിമുട്ടിക്കുന്നുവെന്നും ഞാൻ അനുഭവിച്ചിട്ടുണ്ട് ' അവർ പറഞ്ഞു.

അതേസമയം, അമൃത ഫഡ്നാവിസിന്റെ അഭിപ്രായത്തെ പരിഹസിച്ച് ശിവസേന നേതാവ് പ്രിയങ്ക ചതുർവേദി ട്വീറ്റ് ചെയ്തു. ' ഏറ്റവും മികച്ച ലോജിക്കില്ലായ്മയ്ക്കുള്ള അവാർഡ് മുംബയിലെ മൂന്ന് ശതമാനം ജനങ്ങൾ വിവാഹമോചനം തേടുന്നത് ഗതാഗതക്കുരുക്ക് കാരണമാണെന്ന് അവകാശപ്പെട്ട സ്ത്രീക്ക് നൽകണം. " ബംഗളൂരുവിലെ ജനങ്ങൾ ഇത് വായിക്കരുതെന്നും അത് നിങ്ങളുടെ വിവാഹജീവിതത്തെ ഗുരുതരമായി ബാധിച്ചേക്കാമെന്നും പ്രിയങ്ക പരിഹസിച്ചു.