ശ്രീനഗർ: ഭീകര പ്രവർത്തനങ്ങൾ മഹത്വവത്കരിക്കുന്ന ഉള്ളടക്കമുള്ള പോസ്റ്റുകൾ ഫേസ്ബുക്ക് അടക്കമുള്ള സാമൂഹിക മാദ്ധ്യമങ്ങളിൽ പങ്കുവച്ചെന്നാരോപിച്ച് ദ കാശ്മീർ വാല എന്ന ഓൺലൈൻ ന്യൂസ് മാഗസിന്റെ എഡിറ്റർ ഇൻ ചീഫ് ഫഹദ് ഷായെ ജമ്മു കാശ്മീർ പൊലീസ് അറസ്റ്റ് ചെയ്തു.

ഭീകരതയെ പ്രകീർത്തിക്കുന്നതും രാജ്യത്തെ നിയമ നിർവഹണ ഏജൻസികളുടെ പ്രതിച്ഛായ തകർക്കുന്നതുമാണ് പോസ്റ്റുകൾ. ചില ഫേസ്ബുക്ക് ഉപയോക്താക്കളും വാർത്താപോർട്ടലുകളും ദേശവിരുദ്ധമായ ഫോട്ടോകളും വീഡിയോകളും പങ്കുവയ്ക്കുന്നുണ്ട്. ഇത് ക്രമസമാധാനത്തെയും നിയമപരിപാലനത്തെയും ബാധിക്കുന്നുവെന്നും ഇതെപ്പറ്റി അന്വേഷണം പുരോഗമിക്കുകയാണെന്നും പുൽവാമ പൊലീസ് പറഞ്ഞു.

ഫഹദ് ഷായെ റിമാൻഡ് ചെയ്തു. അതേസമയം ഫഹദിന്റെ അറസ്‌റ്റിനെ അപലപിച്ച ജമ്മു കശ്മീർ മുൻമുഖ്യമന്ത്രി മെഹബൂബ മുഫ്തി സത്യത്തിന് വേണ്ടി നിലകൊള്ളുന്നത് ദേശവിരുദ്ധമായി മാറുകയാണെന്ന് ട്വീറ്റ് ചെയ്തു.