ജമ്മു: ജമ്മു കാശ്മീരിലെ സാംബ സെക്ടറിലെ അന്താരാഷ്ട്ര അതിർത്തിയിൽ മൂന്ന് പാകിസ്ഥാൻ കള്ളക്കടത്തുകാരെ ബി എസ് എഫ് വെടിവച്ചുകൊലപ്പെടുത്തി. മയക്കുമരുന്നു കടത്താൻ ശ്രമിക്കുന്നതിനിടെ ഇന്ന് രാവിലെയാണ് സംഭവം നടന്നത്. 180 കോടി രൂപ വിലവരുന്ന 36 പാക്കറ്റ് ഹെറോയിൻ ഇവരിൽ നിന്ന് കണ്ടെടുത്തു.

പുലർച്ചെ 2.30ഓടെ അതിർത്തിയിൽ കള്ളക്കടത്തു നടക്കുന്നതായി ബി എസ് എഫിന് വിവരം ലഭിച്ചിരുന്നു. തുടർന്ന് നടന്ന വെടിവയ്പ്പിൽ മൂന്ന് കള്ളക്കടത്തുകാരെയും വധിക്കുകയായിരുന്നു. ആക്രമണത്തിൽ ഒരു ബി എസ് എഫ് ജവാന് പരിക്കേറ്റു.

കഴിഞ്ഞ ജനുവരി 28ന് പഞ്ചാബിലെ ഗുർദാസ്പൂരിലെ ഇന്ത്യ പാകിസ്ഥാൻ അതിർത്തിയിലും സമാന സംഭവം നടന്നിരുന്നു. പാകിസ്ഥാൻ കള്ളക്കടത്തുകാരും ബി എസ് എഫും തമ്മിൽ വെടിവയ്പ്പ് നടക്കുകയും ഇവരിൽ നിന്ന് 47 കിലോഗ്രാം ഹെറോയിൻ, രണ്ട് തോക്കുകൾ, വെടിമരുന്ന് എന്നിവ പൊലീസ് പിടിച്ചെടുക്കുകയും ചെയ്തു.