ജമ്മു: ജമ്മു കാശ്മീരിലെ സാംബാ സെക്ടറിൽ അന്താരാഷ്‌ട്ര അതിർത്തിയിൽ മൂന്ന് പാക് കള്ളക്കടത്തുകാരെ ബി.എസ്.എഫ് വെടിവച്ചുകൊന്നു. മയക്കുമരുന്നു കടത്താൻ ശ്രമിക്കുന്നതിനിടെ ഇന്നലെ പുലർച്ചെയായിരുന്നു സംഭവം. ഇവരിൽ നിന്ന് 180 കോടി രൂപ വിലവരുന്ന 36 പാക്കറ്റ് ഹെറോയിൻ കണ്ടെടുത്തു.

പുലർച്ചെ 2.30ഓടെ അതിർത്തിയിൽ കള്ളക്കടത്തു നടക്കുന്നതായുള്ള വിവരം ലഭിച്ചതോടെ ബി.എസ്.എഫ് പ്രദേശത്ത് തിരച്ചിൽ ആരംഭിക്കുകയായിരുന്നു. വെടിവയ്പ്പിനിടെ ഒരു ബി.എസ്.എഫ് ജവാന് പരിക്കേറ്റിട്ടുണ്ട്.

കഴിഞ്ഞ ജനുവരി 28ന് പഞ്ചാബിലെ ഗുർദാസ്പൂരിൽ ഇന്ത്യ - പാക് അതിർത്തിയിൽ പാകിസ്ഥാൻ കള്ളക്കടത്തുകാരും ബി.എസ്.എഫും തമ്മിൽ വെടിവയ്പ്പ് നടക്കുകയും ഇവരിൽ നിന്ന് 47 കിലോഗ്രാം ഹെറോയിൻ, രണ്ട് തോക്കുകൾ, വെടിമരുന്ന് എന്നിവ പിടിച്ചെടുക്കുകയും ചെയ്തിരുന്നു.