മലയാളികൾക്ക് വിദേശത്ത് നിരവധി തൊഴിൽ അവസരങ്ങളാണ് വരാൻ പോകുന്നതെന്ന് ഒഡെപെക് (ഓവർസീസ് ഡവലപ്‌മെന്റ് ആൻഡ് എംപ്ലോയ്‌മെന്റ് പ്രമോഷൻ കൺസൽട്ടന്റ്) ചെയർമാൻ കെ.പി അനിൽകുമാർ. ജർമനിയിൽ10,000 പേർക്ക് വിവിധ മേഖലകളിൽ ജോലി നൽകുന്നത് സംബന്ധിച്ച് കരാർ ഒപ്പുവയ്ക്കുന്നതിനായി ഉടൻതന്നെ മന്ത്രിതല സംഘം അവിടം സന്ദർശിക്കുമെന്ന് അദ്ദേഹം വ്യക്തമാക്കി.
യുഎഇയിലെ ഒരു ഗ്രൂപ്പിന്റെ സ്‌കൂളിൽ നൂറ് അദ്ധ്യാപകരെ ആവശ്യമുണ്ട്. ഫുജൈറ ഭരണാധികാരിക്കു പങ്കാളിത്തമുള്ള കമ്പനിയിൽ നൂറു കണക്കിന് ജോലിക്കാരെ വിവിധ മേഖലകളിൽ ആവശ്യമുണ്ട്. ഇതിനായി റിക്രൂട്ട്മെന്റ് നടത്തും.
പാരാമെഡിക്കൽ സ്‌റ്റാഫുകൾക്കും അവസരങ്ങൾ ഏറെയാണ്. യുകെയിലേക്ക് നൂറ് റേഡിയോ ഗ്രാഫേഴ്‌സിനെ ഉടൻ അയയ്ക്കും. മുൻപ് നഴ്‌സിംഗ് മേഖലയിലേക്കു മാത്രമാണ് റിക്രൂട്ട്മെന്റ് നടത്തിയിരുന്നത്. എന്നാൽ ഇപ്പോൾ എല്ലാ മേഖലകളിലേക്കും റിക്രൂട്ട്മെന്റ് നടത്തുന്നുണ്ട്. ജർമൻ ഉൾപ്പടെയുള്ള ഭാഷകൾ സൗജന്യമായി പഠിപ്പിക്കുന്നുമുണ്ടെന്ന് അനിൽകുമാർ വ്യക്തമാക്കി.