ജയ്‌പൂർ: രാജസ്ഥാൻ വനിതാ കമ്മിഷൻ അദ്ധ്യക്ഷയായി മലയാളിയായ രഹാന റയാസ് ചിസ്തി (റോസമ്മ ജോസഫ്)​ നിയമിതയായി. മൂന്നു വർഷത്തേക്കാണ് നിയമനം. കോട്ടയം കടുത്തുരുത്തി മങ്ങാട്ട് വട്ടത്തൊട്ടിൽ പരേതരായ ജോസഫ് - അന്നമ്മ ദമ്പതികളുടെ മകളായ രഹാന 1976 ൽ റെയിൽവേയിൽ ടൈപ്പിസ്റ്റായാണ് രാജസ്ഥാനിലെത്തിയത്. ചേച്ചി ത്രേസ്യാമ്മ അന്ന് രാജസ്ഥാനിൽ നഴ്സായിരുന്നു.

1980ൽ രാജസ്ഥാൻ സ്വദേശിയും റെയിൽവേ ജീവനക്കാരനുമായിരുന്ന റയാസ് അഹമ്മദ് ചിസ്തിയെ വിവാഹം കഴിച്ച് രാജസ്ഥാനിൽ സ്ഥിര താമസമാക്കി.

1985ൽ രാഷ്ട്രീയ പ്രവർത്തനം ആരംഭിച്ച രഹാന ഇന്ന് സംസ്ഥാന കോൺഗ്രസിലെ പ്രധാന വനിതാ നേതാവാണ്. 1990ൽ യൂത്ത് കോൺഗ്രസ് സെക്രട്ടറിയും പിന്നീട് വൈസ് പ്രസിഡന്റുമായി. സച്ചിൻ പൈലറ്റും അശോക് ഗെലോട്ടും കൊമ്പുകോർത്ത സമയത്തും രഹാന വാർത്തകളിൽ ഇടം നേടി. നിയമസഭാ തിരഞ്ഞെടുപ്പിൽ മത്സരിക്കാൻ രഹാനയുടെ പേരു രാഹുൽ ഗാന്ധി നിർദ്ദേശിച്ചതാണ്. വ്യക്തിപരമായ കാരണങ്ങളാൽ തിരഞ്ഞെടുപ്പ് രാഷ്ട്രീയത്തിൽ നിന്നു രഹാന ഒഴിഞ്ഞുനിൽക്കുകയായിരുന്നു. മുഖ്യമന്ത്രി അശോക് ഗെലോട്ടുമായും സച്ചിൻ പൈലറ്റുമായും അടുത്ത ബന്ധമുണ്ട് രഹാനയ്ക്ക്. രാജസ്ഥാനിലെ ചുരു മരുഭൂമിയോടു ചേർന്ന പ്രദേശത്താണ് താമസം. മക്കളായ ഹസനും ഷിയാനും സ്വകാര്യ കമ്പനികളിൽ ഉദ്യോഗസ്ഥരാണ്.