ഭോപ്പാൽ: ഹോളിവുഡ് സിനിമകളിലെ സൂപ്പർഹീറോകളുടെ ആരാധകരാണ് നമ്മൾ ഒട്ടുമിക്കപ്പേരും. അടുത്തിടെയായി മലയാളികൾക്കും ഒരു സൂപ്പർഹീറോയെ ലഭിച്ചിരുന്നു. എന്നാൽ റീൽ ലൈഫിനപ്പുറം റിയൽ ലൈഫിലും ഇത്തരം അമാനുഷിക ശക്തികൾ ഉണ്ടെന്നതിന് ഉദാഹരണമായി സമൂഹമാദ്ധ്യമങ്ങളിൽ ഒരു വീഡിയോ വൈറലാവുകയാണ്. സ്വന്തം ജീവൻ മറന്ന് മറ്റൊരാൾക്ക് രക്ഷകനായ മുഹമ്മദ് മെഹ്‌ബൂബാണ് ഇപ്പോൾ താരം.

ഫെബ്രുവരി അ‌ഞ്ചിന് ജോലി സ്ഥലത്തേക്ക് പോകുന്നതിനിടെ മെഹ്‌ബൂബ് എന്ന മരപ്പണിക്കാരൻ അറിഞ്ഞിരുന്നില്ല ഒരു ജീവൻ രക്ഷിക്കാനുള്ള നിയോഗം തനിക്ക് മുന്നിലുണ്ടെന്ന്. മദ്ധ്യപ്രദേശിലെ ഭോപ്പാലിൽ ബാർക്കെണ്ടിയിലുള്ള ഫാക്ടറിയിലേക്ക് റെയിൽ പാളത്തിന് അരികിലൂടെ നടക്കുന്നതിനിടെ ട്രെയിൻ വരുന്നത് കണ്ട് നടത്തം നിർത്തി കാത്തു നിൽക്കുകയായിരുന്നു മെഹ്‌ബൂബും മറ്റ് കാൽനടയാത്രക്കാരും. ട്രെയിൻ കടന്നുപോകുന്നതിനായി കാത്തുനിൽക്കുന്നതിനിടെയാണ് ഞെട്ടിക്കുന്ന ഒരു കാഴ്ച മെഹ്‌ബൂബ് കാണുന്നത്. അച്ഛനും അമ്മയുമോടൊപ്പം നിന്നിരുന്ന ഒരു പെൺകുട്ടി പെട്ടെന്ന് പാളത്തിലേയ്ക്ക് വീണു.

Incredible bravery! 37 year old Mehboob was returning to his factory when he and some other pedestrians saw a goods train they stopped to let it pass a girl standing with her parents in fell on the tracks Mehboob sprinted dragged kept her head down @manishndtv @GargiRawat pic.twitter.com/IDqQiBLAv7

— Anurag Dwary (@Anurag_Dwary) February 12, 2022

37കാരനായ മെഹ്‌ബൂബ് ഒരു നിമിഷം പോലും ചിന്തിച്ചുനിന്നില്ല. ഞെട്ടിത്തരിച്ച് നിശ്ചലരായി നിൽക്കുന്ന മറ്റ് യാത്രക്കാരെ തള്ളിമാറ്റി എഴുന്നേൽക്കാൻ പാടുപെടുന്ന കുട്ടിയുടെ അടുത്തേക്ക് പാഞ്ഞു. ട്രെയിൻ തൊട്ടടുത്തെത്താൻ സെക്കന്റുകൾ മാത്രം ബാക്കി നിൽക്കെ കുട്ടിയെയെടുത്ത് തിരികെയോടാൻ വേണ്ടത്ര സമയമില്ലെന്ന് മനസിലാക്കിയ മെഹ്‌ബൂബ് പെൺകുട്ടിയുമായി ട്രാക്കിന്റെ മദ്ധ്യഭാഗത്തായി കിടന്നു. സുരക്ഷ ഉറപ്പാക്കുന്നതിനായി കുട്ടിയുടെ തല നിലത്തേക്ക് താഴ്ത്തി വയ്ക്കാനും മെഹ്‌ബൂബ് മറന്നില്ല. പിന്നാലെ ട്രെയിൻ കടന്നുപോയതിനുശേഷം കുട്ടിയെ മാതാപിതാക്കളെ ഏൽപ്പിക്കുകയും ചെയ്തിട്ടാണ് മെഹ്‌ബൂബ് മ‌ടങ്ങിയത്. സംഭവസ്ഥലത്തുണ്ടായിരുന്ന ചിലർ പകർത്തിയ ദൃശ്യങ്ങൾ സമൂഹമാദ്ധ്യമങ്ങളിൽ ഏറെ പ്രചാരം നേടുകയാണ്. നിരവധി പേർ മെഹ്‌ബൂബിന്റെ ധൈര്യത്തെ പ്രകീർത്തിക്കുകയും പ്രവർത്തിയിൽ അഭിനന്ദനങ്ങൾ അറിയിക്കുകയും ചെയ്തു.