മലയാളത്തിൽ ശ്രദ്ധേയ വേഷങ്ങൾ അവതരിപ്പിച്ച പ്രശസ്ത നടി മാല പാർവ്വതിയുടെ പുതിയ തമിഴ് ചിത്രം എഫ്.ഐ.ആർ സൂപ്പർഹിറ്റായി. കേരളത്തിലും മികച്ച പ്രതികരണമാണ് സിനിമയ്ക്ക് ലഭിക്കുന്നത്. മലയാളിയായ മനു ആനന്ദ് സംവിധാനം ചെയ്ത ഈ ചിത്രത്തിൽ വിഷ്ണു വിശാലാണ് നായകൻ.നായകന്റെ അമ്മ പർവീണ ബീഗം എന്ന മുഴുനീള കഥാപാത്രത്തെയാണ് എഫ്.ഐ.ആറിൽ പാർവ്വതി അവതരിപ്പിച്ചത്. റേബ മോണിക്ക ജോൺ, മഞ്ജിമ മോഹൻ,റേസ വിൽസൺ എന്നിവർക്കൊപ്പം ഗൗതം വാസുദേവ മേനോനും പ്രധാന വേഷത്തിലെത്തുന്നുണ്ട്.പാർവ്വതിയുടെ അഭിനയത്തിന് നല്ല പ്രശംസയാണ് ലഭിക്കുന്നത്.

ഹിന്ദിയിലേക്ക്

നടി രേവതി സംവിധാനം ചെയ്യുന്ന സലാം വെങ്കി എന്ന ഹിന്ദി ചിത്രത്തിൽ അഭിനയിക്കാൻ പാർവ്വതിക്ക് ക്ഷണം ലഭിച്ചിട്ടുണ്ട്. കജോളാണ് ഈ ചിത്രത്തിലെ നായിക.ചാരുകേശ് ശേഖർ സംവിധാനം ചെയ്യുന്ന അമുദ എന്ന തെലുങ്ക് ചിത്രത്തിലും പാർവ്വതിക്ക് നല്ല വേഷമുണ്ട്.ഐശ്വര്യ ലക്ഷ്മിയാണ് ചിത്രത്തിലെ നായിക.ഐശ്വര്യയുടെ അമ്മ വേഷമാണ് പാർവ്വതി അവതരിപ്പിക്കുന്നത്.മലയാളത്തിൽ അമൽ നീരദിന്റെ ഭീക്ഷ്മപർവ്വത്തിലും പാർവ്വതിക്കു വേഷമുണ്ട്.

തമിഴ് തെലുങ്ക് ചിത്രങ്ങളിൽ പാർവ്വതിക്ക് ഇപ്പോൾ നല്ല അവസരം ലഭിക്കുന്നുണ്ട്.ആമസോൺ പ്രൈമിൽ പ്രദർശിപ്പിക്കുന്ന ടക്ക് ജഗദീഷ്, ഹീറോ നാനി, എന്നീ തെലുങ്ക് ചിത്രങ്ങളിലും നെറ്റ് ഫ്ളിക്സിൽ പ്രദർശിപ്പിക്കുന്ന നിമിർ, ഗെയിം ഓവർ എന്നീ തമിഴ് ചിത്രങ്ങളിലും പാർവ്വതി അഭിനയിച്ചിരുന്നു.ഗെയിം ഓവർ തെലുങ്കിലും റിലീസ് ചെയ്തു.മാധവൻ നായകനായ മാരയായിരുന്നു പാർവ്വതിയുടെ മറ്റൊരു തമിഴ് ചിത്രം.