ഹൈദരാബാദ്: കൊൽക്കത്ത തണ്ടർബോൾട്ട്‌സിനെ വീഴ്‌ത്തി പ്രൈം വോളിബോൾ ലീഗിൽ ഹൈദരാബാദ്‌ ബ്ലാക്‌ഹോക്‌സ്‌ മൂന്നാം ജയം കുറിച്ചു. സ്കോർ 15‐-8, 13‐-15, 15-‐9, 15-‐12, 8‐-15. മത്സരത്തിൽ നിന്ന് ഹൈദരാബാദിന്‌ രണ്ട്‌ പോയിന്റ്‌ ലഭിച്ചു. തകർപ്പൻ പ്രകടനം നടത്തിയ ഹൈദരാബാദ് ബ്ലാക്ക് ഹോക്‌സിന്റെ എസ് വി ഗുരു പ്രശാന്ത് കളിയിലെ മികച്ച താരമായി തിരഞ്ഞെടുക്കപ്പെട്ടു.

ഗുരു പ്രശാന്തിന്റെ മിന്നും സ്‌പൈക്കുകളിലൂടെ ആദ്യ സെറ്റിന്റെ തുടക്കത്തിൽതന്നെ ബ്ലാക്‌ഹോക്‌സ്‌ 6‐4ന്‌ ലീഡ്‌ നേടിയിരുന്നു. അമിത് ഗുലിയ, ഇ ജെ ജോൺ ജോസഫ് എന്നിവരും ബ്ലാക്‌ ഹോക്‌സിനായി തിളങ്ങി. പിന്നാലെ ലൂയിസ് അന്റോണിയോ അരിയാസിന്റെ തകർപ്പൻ ബ്ലോക്കിൽ അവർ 11‐6ന്‌ ലീഡ്‌ നേടി. ഒടുവിൽ 15-8ന് ആദ്യ സെറ്റ് സ്വന്തമാക്കി.

രണ്ടാം സെറ്റിൽ കെ രാഹുലും മാത്യു അഗസ്‌റ്റിനും തണ്ടർബോൾട്ടിന്‌ 9-8ന്റെ ലീഡ് നൽകി. എന്നാൽ പ്രശാന്തിന്റെ തകർപ്പൻ സ്‌മാഷ്‌ ബ്ലാക്ക് ഹോക്‌സിന്‌ ഒരു സൂപ്പർ പൊയിന്റ് നൽകി. അതിലൂടെ 12-11 ന് ലീഡ് നേടിയെങ്കിലും സൂപ്പർ പൊയിന്റ് നേടി കൊൽക്കത്ത തണ്ടർബോൾട്ട്‌ ലീഡ് തിരിച്ചുപിടിച്ചു. നിമിഷങ്ങൾക്കുള്ളിൽ അഗസ്‌റ്റിന്റെ മികവിലൂടെ തണ്ടർബോൾട്ട്‌ 15‐13ന്‌ സെറ്റ്‌ നേടി.

മൂന്നാം സെറ്റിൽ ബ്ലാക്‌ ഹോക്‌സ് ശക്തമായി തിരിച്ചുവന്നു. പ്രശാന്തിന്റെ മികവിൽ 5‐0ന് ലീഡ്. ഗൂലിയയും ജോസഫും മിന്നിയതോടെ 11-5ന് ഹൈദരാബാദ് ആധിപത്യം കാട്ടി. പിന്നാലെ 15‐9ന്‌ സെറ്റ്‌ സ്വന്തമാക്കി 2‐1ന്‌ ലീഡ്‌നേടുകയും ചെയ്‌തു.

നാലാം സെറ്റിൽ കൊൽക്കത്തയുടെ അനു ജയിംസ് തകർപ്പൻ സ്‌പൈക്കുകൾ പുറത്തെടുത്തെങ്കിലും ബ്ലാക്ക് ഹോക്‌സ് 11-‐9ന് ലീഡ് സ്വന്തമാക്കി. തുടർന്ന് പ്രശാന്തിന്റെ മറ്റൊരു ഗംഭീരമായ സ്പൈക്കിലൂടെ ബ്ലാക്‌ഹോക്‌സിന്‌ നാലാം സെറ്റ് 15-12ന് സ്വന്തമാക്കി. അവസാന സെറ്റിൽ തുടക്കത്തിൽ നേടിയ 8 - 5ന്റെ ലീഡ് അവസാനം വരെ നിലനിർത്തിയ തണ്ടർബോൾട്ട് 15-8ന് സെറ്റ് സ്വന്തമാക്കി.

അഞ്ച്‌ മത്സരങ്ങളിൽ മൂന്നാംജയമാണ്‌ ഹൈദരാബാദ് ബ്ലാക്ക് ഹോക്‌സിന്‌. നാളെ നടക്കുന്ന മത്സരത്തിൽ കൊച്ചി ബ്ലൂ സ്പൈക്കേഴ്സ് ചെന്നൈ ബ്ലിറ്റ്സിനെ നേരിടും.