കോട്ടയം: അഹമ്മദാബാദ് സ്ഫോടന കേസിൽ വധശിക്ഷയ്‌ക്ക് വിധിക്കപ്പെട്ട മലയാളി സഹോദരന്മാരായ ഈരാറ്റുപേട്ട പീടിയേക്കൽ പി.എ. ഷിബിലി, അനിയൻ പി.എ. ശാദുലി എന്നിവർ വാഗമണിലെ ആയുധ പരിശീലന ക്യാമ്പിന്റെ പേരിൽ കഠിനതടവ് അനുഭവിച്ചു വരികയാണ്.
ഐ.ടി പ്രൊഫഷണലായ ഷിബിലിയും ഇലക്ട്രോണിക്സ് എൻജിനിയറായ ശാദുലിയും ഭീകരപ്രവർത്തനത്തിന് അറസ്റ്റിലാകുമ്പോഴാണ് നാട്ടുകാർ ഇവരെക്കുറിച്ച് കൂടുതൽ അറിയുന്നത്. കമ്പ്യൂട്ടർ ആൻഡ് ഹാർഡ്‌വെയറിൽ ഡിപ്ലോമയ്ക്കുശേഷം ഷിബിലി തിരുവനന്തപുരത്തും ബംഗളുരുവിലും വിവിധ കമ്പനികളിൽ ജോലി ചെയ്തു. പിന്നീട് മുംബയിലേക്ക് മാറി.
2008 മാർച്ച് 26ന് കേരളത്തിൽ നിന്ന് ഇൻഡോറിലേക്കുള്ള യാത്രയ്‌ക്കിടെയാണ് അറസ്റ്റിലാകുന്നത്. വിവിധ സംഘടനകളുടെ ഭാഗമായിരുന്നെങ്കിലും നാട്ടിൽ ഇരുവരും ശാന്തസ്വഭാവക്കാരായാണ് കാണപ്പെട്ടിരുന്നത്. കമ്പ്യൂട്ടർ വിദഗ്ദ്ധനായ ഷിബിലിയും ശാദുലിയും അഹമ്മദാബാദ് സ്ഫോടന കേസിലെ ബുദ്ധികേന്ദ്രങ്ങളിൽ പെട്ടവരാണെന്നാണ് അന്വേഷണ സംഘം പറയുന്നത്.
രാജ്യത്തെ വിവിധ സ്ഫോടനങ്ങളുടെ ആസൂത്രണം വാഗമൺ സിമി ക്യാമ്പിലായിരുന്നുവെന്നാണ് എൻ.ഐ.എയുടെ കണ്ടെത്തൽ. 2007 ഡിസംബർ 10 മുതൽ 22 വരെയാണ് നിരോധിത സംഘടനയായ സ്റ്റുഡന്റ്സ് ഇസ്‌ലാമിക് മൂവ്‌മെന്റ് ഒഫ് ഇന്ത്യ (സിമി) വാഗമണിൽ ആയുധപരിശീലന ക്യാമ്പ് സംഘടിപ്പിച്ചത്. കൊച്ചിയിലെ എൻ.ഐ.എ കോടതി ഇരുവരും ഉൾപ്പെടെ 18പേരെ 2018 മേയിൽ 27 വർഷം കഠിന തടവിന് ശിക്ഷിച്ചിരുന്നു.
കുറ്റം ഒരുമിച്ച് അനുഭവിച്ചാൽ മതിയെന്നതിനാൽ അത് ഏഴുവർഷം കഠിന തടവായി. മക്കൾ നിരപരാധികളാണെന്ന ഉറച്ച വിശ്വാസമുണ്ടെന്ന് ഷിബിലിയുടേയും ശാദുലിയുടേയും പിതാവ് അബ്ദുൾ കരീം പറഞ്ഞു. നീതിയിലുള്ള പ്രതീക്ഷ കൈവിടുന്നില്ല. അഭിഭാഷകരുമായി ആലോചിച്ച് വിധിക്കെതിരെ അപ്പീൽ പോകുമെന്നും അദ്ദേഹം പറഞ്ഞു.
കൂടുതൽ പേരെ കൊല്ലുക ലക്ഷ്യം, ഉന്നമിട്ടത് മോദിയെയും അമിത് ഷായെയും
ന്യൂഡൽഹി:അഹമ്മദാബാദ് സ്ഫോടന പരമ്പര അപൂർവങ്ങളിൽ അപൂർവമായ കേസാണെന്നും കൂടുതൽ ആളുകളെ കൊല്ലാൻ പ്രതികൾ ലക്ഷ്യമിട്ടതായും പ്രത്യേക കോടതി. കൂടുതൽ പേരെ കൊലപ്പെടുത്തുക എന്ന ഉദ്ദേശ്യത്തോടെ രണ്ട് ആശുപത്രികളിലും പ്രതികൾ സ്ഫോടനം ആസൂത്രണം ചെയ്തതായി 7,000 പേജുള്ള വിധിയിൽ കോടതി ചൂണ്ടിക്കാട്ടി.
അന്നത്തെ ഗുജറാത്ത് മുഖ്യമന്ത്രി നരേന്ദ്ര മോദി, മുൻ മന്ത്രി അമിത് ഷാ, ആനന്ദിബെൻ പട്ടേൽ, നിതിൻ പട്ടേൽ തുടങ്ങിയവരെ പ്രതികൾ ഉന്നമിട്ടിരുന്നു. ഗുഡാലോചനയുടെ ഓരോ ഘട്ടത്തിലും പ്രതികളെല്ലാവരും പരസ്പരം സഹകരിച്ചു. 2002 നും 2008നും ഇടയിൽ അഹമ്മദാബാദ്, വഡോദര, സൂറത്ത് തുടങ്ങിയ സ്ഥലങ്ങളിൽ നിരവധി യോഗങ്ങൾ നടത്തി. വാടക വീടുകളിലും ഹോട്ടലുകളിലും വ്യാജ പേരുകളിൽ താമസിച്ച് ബോംബുകൾ നിർമ്മിച്ചു. നരേന്ദ്ര മോദി, അമിത് ഷാ തുടങ്ങിയവർക്കെതിരെ സമാന ആക്രമണം നടത്താൻ പദ്ധതിയിട്ടു.
ഭാഗ്യം കൊണ്ടാണ് അവർ രക്ഷപ്പെട്ടത്. സൂറത്തിൽ നിക്ഷേപിച്ച 29 ബോംബുകൾ വഴി കൂടുതൽ ആളുകളെ കൊല്ലാനിട്ട പദ്ധതി ബോംബുകളിലെ സർക്യൂട്ടിലെ തകരാർ കൊണ്ട് മാത്രമാണ് നടക്കാതെ പോയത്. ജിഹാദ് എന്ന പദം വിശുദ്ധമായ ഒന്നാണ്. എന്നാൽ അത് തീവ്രവാദ സംഘടനകൾ തെറ്റായ രീതിയിൽ രാഷ്ട്രത്തിനെതിരായി ഉപയോഗിക്കുകയായിരുന്നുവെന്ന് വിധിയിൽ പറയുന്നു.