ടൊവിനോ നായകനാകുന്ന ചിത്രം 'വാശി' യുടെ ഫസ്റ്റ് ലുക്ക് പോസ്റ്റർ പുറത്ത്. മോഹൻലാലാണ് തന്റെ ഫേസ്ബുക്ക് പേജിലൂടെ പോസ്റ്റർ പുറത്തുവിട്ടത്. വിഷ്ണു രാഘവ് സംവിധാനം ചെയ്യുന്ന ചിത്രത്തിൽ കീർത്തി സുരേഷും പ്രധാന വേഷത്തിൽ എത്തുന്നു. നീണ്ട ഇടവേളയ്ക്ക് ശേഷം കീർത്തി മരക്കാറിലൂടെയാണ് വീണ്ടും മലയാളത്തിൽ തിരിച്ചെത്തിയത്. രേവതി കലാമന്ദിറാണ് ചിത്രം നിർമിക്കുന്നത്.

ചിത്രത്തിന്റെ ടൈറ്റിലും പ്രഖ്യാപിച്ചത് മോഹൻലാലിന്റെ ഫേസ്ബുക്ക് പേജിലൂടെയാണ്. ജാനിസ് ചാക്കോ സൈമൺ കഥയെഴുതിയ ചിത്രത്തിന്റെ തിരക്കഥ സംവിധായകൻ വിഷ്ണു തന്നെയാണ് നിർവഹിക്കുന്നത്. റോബി വർഗ്ഗീസ് രാജാണ് ചിത്രത്തിന്റെ ഛായാഗ്രാഹകൻ. സംവിധായകൻ മഹേഷ് നാരായണനാണ് എഡിറ്റിങ്ങ് നിർവഹിച്ചിരിക്കുന്നത്. വിനായക് ശശികുമാറിന്റെ വരികള്‍ക്ക് കൈലാസ് മേനോനാണ് സംഗീത സംവിധാനം നിര്‍വഹിക്കുന്നത്.