ആദ്യ മത്സരത്തി​ൽ കേരളം മേഘാലയയെ ഇന്നിംഗ്സിനും 166 റൺ​സിനും പരാജയപ്പെടുത്തി

അരങ്ങേറ്റമത്സരത്തി​ൽ മാൻ ഒഫ് ദ മാച്ചായി​ ഏദൻ ആപ്പി​ൾ ടോം

രാജ്‌കോട്ട്: രഞ്ജി ട്രോഫി പുതി​യ സീസണി​ലെ ആദ്യ മത്സരത്തി​ൽ തന്നെ ഇടി​വെട്ട് ഇന്നിംഗ്സ് വി​ജയവുമായി​ കേരളം. രാജ്കോട്ടി​ൽ മേഘാലയയെ ഇന്നിംഗ്സിനും 166 റൺ​സിനുമാണ് സച്ചി​ൻ ബേബി​യും കൂട്ടരും കശക്കി​യെറി​ഞ്ഞത്. മൂന്നാം ദി​നമായ ഇന്നലെ മേഘാലയയെ രണ്ടാം ഇന്നിംഗ്സിൽ 191 റൺ​സിന് പുറത്താക്കി​യാണ് കേരളം വി​ജയം ആഘോഷി​ച്ചത്.ഇതോടെ കേരളത്തി​ന് വിലപ്പെട്ട ഏഴു പോയിന്റ് ലഭി​ച്ചു. എലൈറ്റ് ഗ്രൂപ്പ് എയിൽ ഒന്നാമതാണ് കേരളം.

ആദ്യ ഇന്നിംഗ്സി​ൽ മേഘാലയയെ 148 റൺസിന് ആൾഒൗട്ടാക്കിയശേഷം കേരളം ഒൻപത് വിക്കറ്റ് നഷ്ടത്തിൽ 505 റൺസെടുത്ത് ഡിക്ളയർ ചെയ്തിരുന്നു. 357 റൺസിന്റെ ഒന്നാം ഇന്നിംഗ്സ് ലീഡ് വഴങ്ങിയ മേഘാലയ രണ്ടാം ഇന്നിംംഗ്സിലും തകർന്നതോടെയാണ് കേരളം ഒരു ദിനം അവശേഷിക്കവേ വിജയം നേടിയെടുത്തത്. നാല് വിക്കറ്റ് വീഴ്ത്തിയ ബേസിൽ തമ്പിയുടെയും മൂന്ന് വിക്കറ്റെടുത്ത ജലജ് സക്‌സേനയുടേയും ബൗളിംഗ് മികവിലാണ് രണ്ടാം ഇന്നിംഗ്സിൽ കേരളം എതിരാളികളെ ചുരുട്ടിയത്. ആദ്യ ഇന്നിംഗ്സിൽ നാലുവിക്കറ്റും രണ്ടാം ഇന്നിംഗ്സിൽ രണ്ടുവിക്കറ്റും നേടിയ പേസർ ഏദൻ ആപ്പിൾ ടോം അരങ്ങേറ്റമത്സരത്തിൽതന്നെ മാൻ ഒഫ് ദ മാച്ചായി.

സെഞ്ച്വറികൾ നേടിയ ഓപ്പണർമാരായ പി.രാഹുലും(147),രോഹൻ എസ്.കുന്നുമ്മലും (107) വത്സൽ ഗോവിന്ദും(106), അർദ്ധസെഞ്ച്വറി നേടിയ നായകൻ സച്ചിൻ ബേബിയുമാണ് (56)കേരളത്തിനായി ബാറ്റിംഗിൽ തിളങ്ങിയത്.ഇന്നലെ 76 റൺസുമായി ബാറ്റിംഗ് പുനരാരംഭിക്കാനെത്തിയ വത്സൽ 193 പന്തുകളിൽ എട്ടു ഫോറും ഒരു സിക്സും പായിച്ചാണ് 106 റൺസുമായി പുറത്താകാതെ നിന്നത്. വത്സലിന്റെ ആദ്യ രഞ്ജി സെഞ്ച്വറിയാണിത്.

24ന് ഗുജറാത്തിന് എതിരെയാണ് കേരളത്തിന്റെ അടുത്ത മത്സരം.