 സെബിക്ക് അപേക്ഷ സമർപ്പിച്ചു

കൊച്ചി: ആലുവ ആസ്ഥാനമായ പ്രമുഖ സ്വകാര്യ ബാങ്കായ ഫെഡറൽ ബാങ്കിന് കീഴിലെ ബാങ്കിതര ധനകാര്യസ്ഥാപനമായ (എൻ.ബി.എഫ്.സി) ഫെഡ്ബാങ്ക് ഫിനാൻഷ്യൽ സർവീസസ് ലിമിറ്റഡ് (ഫെഡ്ഫിനി) പ്രാരംഭ ഓഹരി വില്പനയ്ക്കുള്ള അപേക്ഷ (ഡി.ആർ.എച്ച്.പി) സെബിക്ക് സമർപ്പിച്ചു. 900 കോടി രൂപയുടെ പുതു ഓഹരികളും (ഫ്രഷ് ഇഷ്യൂ) നിലവിലെ ഓഹരി ഉടമകളുടെ 4.57 കോടി ഓഹരികൾ ഓഫർ ഫോർ സെയിൽ (ഒ.എഫ്.എസ്) ഇനത്തിലും വിറ്റഴിക്കാനാണ് ലക്ഷ്യമിടുന്നത്.

ഫെഡ്ഫിനയിൽ ഫെഡറൽ ബാങ്കിന് 73.31 ശതമാനവും ട്രൂ നോർത്തിന് 25.76 ശതമാനവും ഓഹരി പങ്കാളിത്തമാണുള്ളത്. ഐ.പി.ഒയ്ക്കുശേഷവും ഫെഡ്ഫിനയിൽ 51 ശതമാനത്തിനുമേൽ ഓഹരി പങ്കാളിത്തം നിലനിറുത്തുമെന്ന് ഫെഡറൽ ബാങ്ക് വ്യക്തമാക്കിയിട്ടുണ്ട്.

മികച്ച പ്രവർത്തനം ഫെഡ്ഫിന തുടരുന്നതാണ് ഇതിന് ഫെഡറൽ ബാങ്കിനെ പ്രേരിപ്പിക്കുന്നത്. മികച്ച വളർച്ച കുറിക്കുന്ന ഗോൾഡ് ലോൺ സ്ഥാപനമാണ് ഫെഡ്ഫിന. 463 ശാഖകളുള്ള ഫെഡ്ഫിനയ്ക്ക് 15 സംസ്ഥാനങ്ങളിലും കേന്ദ്രഭരണ പ്രദേശങ്ങളിലും സാന്നിദ്ധ്യമുണ്ട്.