ലോസ് ഏഞ്ചൽസ്: സെൽഫ് ഗോളിൽ ഹാട്രിക്ക് തികച്ച ന്യൂസിലൻഡ് വനിതാ ഡിഫൻഡർ മക്കെയ്‌ല മൂർ. ലോസ് ഏഞ്ചൽസിൽ ഷീ ബിലീവേഴ്സ് കപ്പിൽ അമേരിക്കയ്ക്ക് എതിരെയായിരുന്നു മൂർ മൂന്ന് തവണ സ്വന്തം പോസ്റ്റിൽ ഗോളടിച്ചത്. മത്സരത്തിൽ 5-0ത്തിന് ന്യൂസിലൻഡ് തോറ്റു. അമേരിക്കൻ താരങ്ങളുടെ ക്രോസുകളാണ് മൂർ സ്വന്തം പോസ്റ്റിലേക്ക് തിരിച്ചു വിട്ടത്. 5,​6,​86 മിനിട്ടുകളിലായിരുന്നു ഇംഗ്ലീഷ് ക്ലബ് ലിവർപൂളിന്റെ വനിതാ ടീമംഗമായ മൂറിന്റെ സെൽഫ് ഗോളുകൾ വന്നത്. ആദ്യം വലങ്കാൽ കൊണ്ടും രണ്ടാമത് ഹെഡ്ഡറായും മൂന്നാമത് ഇടങ്കാൽ കൊണ്ടുമായിരുന്നു മൂറിന്റെ ഗോളുകൾ. മൂറിന്റെ സെൽഫ് ഗോൾ സോഷ്യൽ മീഡിയയിൽ വൈറലായി.